کوئٹہ: صوبہ بلوچستان کے دارالحکومت کوئٹہ کے منان چوک پر ملزمان نے غنڈہ گردی کرتے ہوئے فائرنگ اور چاقوؤں کے وار کر کے 3 افراد کو زخمی کردیا۔ پولیس تماشہ دیکھتی رہی۔ واقعے کی فوٹیج اے آر وائی نیوز نے حاصل کرلی۔
کوئٹہ کے منان چوک پر قانون کے رکھوالوں کے سامنے قانون کا خون ہوگیا۔ ڈسٹرکٹ عدالت کے قریب چاقو اور گولیاں چل گئیں۔
عدالت روڈ پر پرانی دشمنی کی بنا پر کار سوار غنڈوں کے گروپ نے پیشی پر آنے والوں پر حملہ کردیا۔ کار سوار ملزمان نے چن چن کر مخالف گروپ کے افراد پر گولیاں برسائیں اور چاقو کے وار کر کے لہو لہان کردیا۔
زخموں سے چور افراد تڑپتے رہے لیکن کوئی مدد کو نہ آیا۔ پاس ہی کھڑے پولیس اہلکاروں پر بھی بدترین بربریت کا کوئی اثر نہیں ہوا جو خاموش تماشائی بنے قانون کو پامال ہوتا دیکھتے رہے۔
ملزمان سر عام غنڈہ گردی کر کے اطمینان سے گاڑی میں بیٹھے اور فرار ہوگئے۔ اے آر وائی نیوز پر خبر نشر ہونے کے بعد وزیر اعلیٰ بلوچستان نے واقعے کا نوٹس لے کر وقوعے پر موجود اہلکاروں کی معطلی کی ہدایت کردی۔
