کوئٹہ: وفاق نے کوئٹہ کے لیے 100 گرین بسوں کی فراہمی کا منصوبہ منسوخ کر دیا۔
ذرائع کے مطابق صوبائی حکومت نے وفاقی بجٹ میں 100 گرین بسیں فراہم کرنے کی تجویز دی تھی، تاہم پلاننگ کمیشن نے 100 کی بجائے 25 بسوں کی منظوری دی، بعد ازاں سی ڈی ڈبلیو پی اجلاس میں اسے بھی منسوخ کر دیا گیا۔
واضح رہے کہ بلوچستان واحد صوبہ ہے جہاں شہریوں کو ماس ٹرانزٹ کی سہولت میسر نہیں ہے، صوبائی حکومت کی جانب سے نجی کمپنی کے ذریعے 8 گرین بسیں چلائی جا رہی ہیں۔
ترجمان بلوچستان حکومت شاہد رند کا کہنا ہے کہ فی الحال یہ منصوبہ منسوخ ہوا ہے اس معاملے کو دوبارہ وفاق کے ساتھ اٹھائیں گے، کوئٹہ میں ماس ٹرانزٹ گرین بسوں کی فراہمی وزیر اعلیٰ بلوچستان کی ترجیح میں شامل ہے۔
بی آر ٹی بس میں چوری کی بڑھتی وارداتیں: جرائم پیشہ خواتین کی تصاویر اسٹیشنز پر آویزاں
شاہد رند کا کہنا تھا کہ سو بسیں نہ بھی ملیں تو زیادہ سے زیادہ بسیں وفاق سے لینے کی کوشش کریں گے، باقی بسیں صوبائی بجٹ سے پورا کرنے کی کوشش کریں گے، انھوں نے کہا کہ صوبائی تجویز بجٹ میں شامل کرنے نہ کرنے کا فیصلہ وفاق کا حق ہے، اس میں کوئی منفی چیز نہیں ہے، امید ہے وفاق کے ساتھ دوبارہ بات چیت میں درمیانی راستہ نکل آئے گا۔
