کوئٹہ: بلوچستان کے مرکزی شہر کوئٹہ میں بھی موٹر سائیکل چھیننے کی ایک واردات کی فوٹیج سامنے آ گئی ہے۔
تفصیلات کے مطابق کوئٹہ میں اسلحے کے زور پر راہزنی کی وارداتوں کا سلسلہ جاری ہے، گزشتہ روز زاہد محمود نامی شہری سے جان محمد روڈ پر گلی کے اندر مسلح افراد موٹر سائیکل چھین کر فرار ہو گئے۔
اس واقعے کی سی سی ٹی وی فوٹیج اے آر وائی نیوز کو موصول ہوئی ہے، جس سے پتا چلتا ہے کہ یہ واردات کل شام ساڑھے آٹھ بجے کی گئی تھی۔
شہری کا پیچھا کر کے آنے والے 3 لٹیرے ایک موٹر سائیکل پر سوار تھے، جیسے ہی شہری اپنے گھر کے دروازے پر پہنچا، پیچھے سے لٹیروں نے اسے گھیر لیا۔
دو لٹیروں نے شہری سے اسلحے کے زور پر موٹر سائیکل چھینی، اور فرار ہو گئے، پولیس کا کہنا ہے کہ موٹر سائیکل چھننے کی واردات کا مقدمہ درج کر لیا گیا ہے، اور ملزمان کی تلاش جاری ہے۔ یاد رہے کہ 2 روز قبل خروٹ آباد کے علاقے میں موٹر سائیکل چھین کر ایک شہری کو قتل کر دیا گیا تھا۔
