کراچی : اسپیشل انویسٹی گیشن یونٹ نے کراچی میں کامیاب کارروائی کرتے ہوئے مبینہ طور پر بھارتی خفیہ ایجنسی ریسرچ اینڈ اینالائسز ونگ (را) کے ایجنٹ کو گرفتار کرلیا۔
اس حوالے سے ایس آئی یو حکام کا کہنا ہے کہ ماری پور میں کارروائی کے دوران’’را‘‘کے ایجنٹ کو حراست میں لیا گیا ہے۔
ایس ایس پی ایس آئی یو شعیب میمن نے میڈیا کو بتایا کہ ملزم محمد سلیم کو مچھلی چورنگی منوڑہ روڈ سے گرفتار کیا گیا۔
انہوں نے کہا کہ گرفتار ملزم کے قبضے سے دستی بم، آوان بم، لانچر اور پستول برآمد ہوا ہے، اس کے علاوہ ملزم ککی تلاشی کے دوران اس کے پاس سے مختلف محکموں کے سروس کارڈ بھی ملے ہیں۔
شعیب میمن کا کہنا تھا کہ ملزم کے پاس مختلف ناموں سے پاسپورٹس اور شناختی کارڈ موجود تھے، ملزم سے منوڑہ اور چائنا پورٹ کے نقشہ جات برآمد کیے گئے ہیں۔
ایس ایس پی نے مزید بتایا کہ برآمد ہونے والے پاسپورٹ کے مطابق ملزم نے مختلف اوقات میں پاکستان سے انڈیا کا سفر بذریعہ نیپال کیا۔
غیر قانونی اسلحہ اور دیگر پاکستان مخالف دستاویزات کی برآمدگی کے بعد گرفتار ملزم کے خلاف مجموعی طور پر تین مقدمات درج کیے گئے ہیں۔ ملزم کی سرگرمیوں سے متعلق مزید تفصیلات جاننے کے لیے تفتیش کا عمل جاری ہے۔
یاد رہے کہ رواں سال مئی میں کراچی کے علاقے کورنگی میں حساس اداروں اور پولیس نے مشترکہ کارروائی میں بھارتی خفیہ ایجنسی را کے مزید دو تربیت یافتہ دہشت گردوں کو گرفتار کیا تھا۔
حساس اداروں اور کورنگی پولیس نے دو بھارتی ایجنٹوں خاور حسین ولد عبدالغنی اور محمد جابر ولد مشتاق کو گرفتار کیا تھا اور ان کی نشاندہی پر مشترکہ ٹیم نے را کے تربیت یافتہ ماسٹر مائنڈ شیخ محمد ایوب عرف ایوب انصاری کو ساتھی حسن رضا سمیت گرفتار کیا تھا۔
بھارتی ماسٹر مائنڈ ایجنٹ ایوب 1998ء سے پاکستان میں اپنی بھارتی شناخت چھپا کر مقیم ہے، ملزم نے وزٹ ویزا پر کراچی آکر غیر قانونی طور پر پاکستانی پاسپورٹ اور شناختی کارڈ حاصل کیا۔
