بہاولپور: خیرپور ٹامیوالی میں پاک فوج کے بری دستوں اور پاک فضائیہ کی رعد البرق کے نام سے مشترکہ مشقیں جاری ہیں۔
تفصیلات کے مطابق بہاولپور کے علاقے خیر پور ٹامیوالی میں پاک فوج اور فضائی کی س رعد البرق نامی مشق ہورہی ہے جن کے معائنے کے لیے منعقدہ تقریب میں وزیراعظم نواز شریف اور آرمی چیف جنرل راحیل شریف بھی شریک ہیں۔
تقریب میں وفاقی وزیر دفاع خواجہ آصف ، وفاقی وزیرخزانہ اسحاق ڈار، قومی سلامتی کے مشیر ناصر جنجوعہ اور دیگر اہم شخصیات موجود ہیں۔سربراہ پاک فضائیہ ایئرچیف مارشل سہیل امان،نیول چیف ایڈمرل ذکاءاللہ بھی شریک ہیں۔چیرمین جوائنٹ چیفس آف اسٹاف کمیٹی جنرل راشد محمود بھی اس پروقار تقریب میں شریک ہیں۔
وزیراعظم نواز شریف کا خطاب
وزیراعظم نواز شریف نے تقریب سے خطاب کرتے ہوئے کہا کہ رعد البرق مشقیں پاک فوج کی پیشہ ورانہ قوت کا اظہار ہے اور ہمیں فخر ہے کہ پاکستان کی افواج کا شمار دنیا کی بہترین افواج میں ہوتا ہے۔
انہوں نے کہا کہ رعدالبرق 2016 مشقوں کا معائنہ کرکے خوشی ہوئی‘ پاک فوج کسی بھی قسم کی جارحیت کا مکمل جواب دینے کی صلاحیت رکھتی ہے۔
ان کا کہنا تھا کہ ہماری حکومت دوسرے ممالک کے معاملات میں عدم مداخلت کی پالیسی پر عمل پیرا ہے اور ہم اپنے پڑوسی ممالک سے بھی یہی امید رکھتے ہیں۔
تقریب سے خطاب کرتے ہوئے ان کا کہنا تھا کہ اقتصادی ترقی اسٹریٹجک پالیسی کا اہم حصہ ہے۔
انہوں نے یہ بھی کہا کہ پاکستان کے دفاع کے لیے اپنی جان کا نذرانہ پیش کرنے والے جوانوں کی قربانیوں کو ضائع نہیں جانیں دیں گے۔ ساری دنیا ضربِ عضب جیسے اہم اور مشکل ترین آپریشن میں ہماری کامیابیوں کےبارے میں جانتی ہے۔
وزیراعظم نے کہا کہ کشمیر کا مسئلہ پاکستان اور بھارت کے درمیان بنیادی تنازعہ ہے ‘ کشمیر میں بھارتی مظالم اور لائن آف کنٹرول پر بھارتی اشتعال انگیزی سے دنیا کو آگاہ کررہے ہیں، ان کا کہنا تھا کہ دشمن نے اپنے عزائم ساری دنیا کے سامنے آشکار کردیے ہیں۔
ان کا کہنا تھا کہ گوادر سے تجارتی قافلے کا روانہ ہونا اقتصادی سرگرمی سے زیادہ ہے‘ دہشت گرد ملک کو عدم استحکام کا شکار کرنا چاہتے ہیں لیکن انہیں ان کے عزائم میں کامیاب نہیں ہونے دیا جائے گا ۔
تقریر کے اختتام پر وزیراعظم نے آرمی چیف جنرل راحیل شریف اور پاک فوج کے دیگراہم افسران کی خدمات کو خراجِ تحسین پیش کیا۔
مشقوں کے معائنے کے لیے پاکستان کے دیرینہ دوست ملک سعودی عرب کی مسلح افواج کے ڈپٹی چیف آف اسٹاف بھی تقریب میں موجود ہیں۔
مشقوں میں شامل ٹینک اورآرٹلری نے اہداف کو کامیابی سے نشانہ بنا نے کا شاندار مظاہرہ کیا جبکہ لڑاکا طیاروں نے بھی اہداف کو کامیابی سے نشانہ بنانے کا مظاہرہ کیا۔
تقریب میں لیفٹیننٹ جنرل اشفاق ندیم نے مشقوں میں استعمال ہونیوالےمختلف ہتھیاروں سے متعلق بریفنگ دی اور خطاب کرتے ہوئے کہا کہ رعد البرق نامی ان مشقوں کامقصد پاک فوج کی حربی صلاحیت میں اضافہ کرنا ہے۔
