شوبز انڈسٹری کی معروف اداکارہ رابعہ کلثوم نے پاکستانی فنکاروں کے بھارت میں کام کرنے پر باضابطہ پابندی عائد کرنے کا مطالبہ کردیا۔
فوٹو اور ویڈیو شیئرنگ ایپ انسٹاگرام پر اداکارہ رابعہ کلثوم نے فنکاروں کو کہا کہ وہ مستقبل میں بالی ووڈ میں کام نہ کریں ورنہ براہ راست تھپڑ کھائیں گے۔
اداکارہ نے لکھا کہ ’ایسے اداکاروں کے منہ پر پہلا ٹماٹر میں ماروں گی۔‘
رابعہ کلثوم نے آخر میں مطالبہ کیا کہ ’پاکستانی فنکاروں کے بھارت جانے پر پابندی کے لیے پارلیمنٹ میں آئین منظور کیا جائے۔‘
واضح رہے کہ حالیہ پاک بھارت کشیدگی کے بعد بھارت نے تمام پاکستانی فنکاروں کے لیے اپنے دروازے بند کر دیے ہیں۔
انتہا پسندوں کے دباؤ پر متعدد بھارتی ڈائریکٹرز نے پاکستانی فنکاروں کے ساتھ جاری منصوبے معطل کر دیے، یہاں تک کہ اداکار فواد خان کی نئی فلم ’عبیر گلال‘ کی ریلیز بھی روک دی گئی۔
بھارتی اداکارہ وانی کپور نے فواد خان کے ساتھ اپنی تمام تصاویر سوشل میڈیا سے ہٹا دیں، جو موجودہ ماحول میں خوف و دباؤ کی عکاسی کرتی ہیں۔
رابعہ کلثوم سینئر اداکارہ پروین اکبر کی بیٹی، اداکار فیضان شیخ کی بہن اور اداکارہ ماہم عامر کی نند ہیں، وہ ‘مجھے پیار ہوا تھا‘ سمیت متعدد ڈراموں میں اداکاری کے جوہر دکھا چکی ہیں۔
