کراچی : انٹرپول کی مدد سے ملائیشیا سے گرفتار ہونے والے ایم کیو ایم لندن کے ٹارگٹ کلر کو بیس روز کے جسمانی ریمانڈ پر پولیس کے حوالے کر دیا گیا، ملزم نے ابتدائی تفتیش میں اہم انکشافات کیے ہیں۔
تفصیلات کے مطابق سنگین جرائم میں کراچی پولیس کو مطلوب ایم کیو ایم لندن کے ٹارگٹ کلر رئیس مما نے تفتیش میں بڑے انکشاف کر دیئے۔ پولیس نے ان انکشافات کی تحقیقات کے لئے جےآئی ٹی بنانے کا فیصلہ کرلیا۔
قتل، دہشت گردی، بھتہ خوری اور دیگر سنگین جرائم میں ملوث مطلوب مبینہ ٹارگٹ کلر رئیس مما پولیس کی گرفت میں آگیا، ایم کیو ایم کورنگی کے سابق سیکٹر انچارج کو انٹرپول کی مدد سےملائیشیا سے گرفتارکر کے گزشتہ روز پاکستان لایا گیا۔
ملزم کو کراچی ایئر پورٹ سے پولیس نے اپنی حراست میں لے لیا، ملزم رئیس مما کو آج سندھ ہائی کورٹ میں پیش کیا گیا، اس موقع پر سخت حفاظتی انتظامات کیے گئے تھے، عدالت نے پولیس کی استدعا پر ملزم کو بیس دن کے جسمانی ریمانڈ پر پولیس کے حوالے کردیا۔
پولیس کے مطابق دوران تفتیش ملزم نے بتایا کہ وہ ایم کیو ایم لندن رابطہ کمیٹی کے انچارج حماد صدیقی کا فرنٹ مین تھا،چکراگوٹھ میں پولیس وین پر فائرنگ کی تھی،جس میں بارہ سے زائد اہلکاروں کو موت کے گھاٹ اتارا گیا۔
مزید پڑھیں: ٹارگٹ کلر رئیس مما انٹرپول کے ذریعے گرفتار، ملزم ملائیشیا سے پاکستان منتقل
اس کے علاوہ ایم کیوایم حقیقی کے درجنوں کارکنوں سمیت لیاری گینگ وار عزیرگروپ کے کمانڈر ملا راجو اور اس کے درجن سے زائد ساتھیوں کو قتل کیا۔ ملزم کے خلاف تھانہ کورنگی میں چار اور زمان ٹاؤن میں آٹھ مقدمات کا ریکارڈ ملا ہے، رئیس مما سے تفتیش کے لئے جے آئی ٹی بنانے کا فیصلہ کیا گیا ہے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
