اسلام آباد: قومی احتساب بیورو (نیب) کے ریمانڈ پر موجود سابق وفاقی وزیر ریلوے خواجہ سعد رفیق ریلوے خسارہ کیس کی سماعت کے لیے سپریم کورٹ میں پیش ہوئے، کیس کی سماعت اگلے ہفتے تک ملتوی کردی گئی۔

تفصیلات کے مطابق پاکستان مسلم لیگ ن کے رہنما و سابق وفاقی وزیر ریلوے خواجہ سعد رفیق کو عدالت میں لایا گیا۔ چیف جسٹس میاں ثاقب نثار نے کہا کہ خواجہ صاحب آپ کیوں آجاتے ہیں ہم نے تو طلب کیا ہی نہیں۔ ہم نے آڈیٹر جنرل سے جواب مانگا تھا۔

چیف جسٹس نے کہا کہ آڈیٹر جنرل کی رپورٹ کہاں ہے جس پر خواجہ سعد رفیق کے وکیل نے کہا کہ رپورٹ لاہور میں جمع ہوئی ہے۔ چیف جسٹس نے کہا کہ رپورٹ ابھی تک ہم تک نہیں پہنچی۔

چیف جسٹس نے کہا کہ اگلے ہفتے جواب آجائے تو کیس سنیں گے۔ کیس کی مزید سماعت اگلے ہفتے تک ملتوی کردی گئی۔

گزشتہ سماعت پر خواجہ سعد رفیق نے عدالت کو بتایا تھا کہ ریلوے میں گراں قدر کام کیا ہے، افسوس ہے شیخ رشید نے لوکو موٹیو کے بارے میں عدالت میں غلط بیانی کی۔

انہوں نے کہا تھا کہ لوکو موٹیو نہ 22 کروڑ میں آتا ہے نہ ہی ہم نے 45 کروڑ میں خریدا، قیمت خرید اور جس قیمت پرہم نے لیا دونوں غلط بتا رہے ہیں۔

خواجہ سعد رفیق نے ریلوے کی فرانزک آڈٹ رپورٹ پر بھی جواب داخل کروا دیا تھا۔