نئی دہلی : بھارت میں دو نوجوان موبائل گیم کی بھینٹ چڑھ گئے، ریلوے لائن پر بیٹھ کر کانوں میں ہیڈ فون لگا کر گیم کھیلنا ان کی زندگی لے گیا۔
تفصیلات کے مطابق بھارت کے مغربی بنگال کے شمالی 24 پرگنہ کے ٹھاکر نگر میں ریلوے پٹری پر بیٹھ کر موبائل فون پر گیم کھیلنے والے دو نوجوان لوکل ٹرین کی زد میں آنے سے ہلاک ہوگئے جبکہ ایک کی حالت نازک بتائی جارہی ہے۔
اس حوالے سے بھارتی میڈیا کا کہنا ہے کہ یہ واقعہ جمعرات کی صبح اس وقت پیش آیا جب تین نوجوان ریلوے پٹری پر بیٹھ کر موبائل فون میں گیم کھیل رہے تھے کہ اسی دوران لوکل ٹرین نے آکر انہیں کچل ڈالا۔
کانوں میں ہیڈ فون لگے ہونے کے باعث وہ اپنی موت کی صورت میں آنے والی ٹرین کی آواز نہ سن سکے، مذکورہ واقعے میں تین میں سے دو نوجوان موقع پر ہی ہلاک ہو گئے جبکہ تیسرے نوجوان کو انتہائی تشویشناک حالت میں قریبی اسپتال میں داخل کرادیا گیا۔
علاقہ مکینوں نے صحافیوں کو بتایا کہ یہاں اکثر صبح شام اور رات کے وقت نوجوان ریلوے پٹری پر بیٹھ کر گیم کھیلتے رہتے ہیں اور کھیلنے کے دوران دنیا سے بےخبر ہوکر لاپرواہ ہو جاتے ہیں اور اسی کے سبب یہ واقعہ پیش آیا۔
