کراچی: شہر قائد میں ٹرین میں چڑھتے وقت توازن برقرار نہ رکھ سکنے والے مسافر کی جان کو اس وقت خطرہ لاحق ہو گیا تھا جب اس کا پیر پھسل گیا، تاہم ریلوے پولیس اہلکار نے بروقت اسے کھینچ لیا۔
تفصیلات کے مطابق ریلوے پولیس اہلکار نے ٹرین سے گرنے والے ایک مسافر کی جان بچائی ہے، جس پر سہیل نامی مسافر نے پولیس کانسٹیبل مجاہد بٹ کا شکریہ ادا کرنے کی ویڈیو بھی جاری کی ہے۔
لانڈھی اسٹیشن پر پاک بزنس ایکسپریس بغیر اسٹاپ کے اچانک رک گئی تھی، کراچی سے لاہور جانے والا مسافر سہیل پانی لینے اتر گیا، تاہم اس دوران ہی ٹرین چل پڑی تو مسافر نے بھاگ کر ریل پر چڑھنے کی کوشش کی تاہم اس کا پیر پھسل گیا۔
پلیٹ فارم پر ریلوے کانسٹیبل مجاہد بٹ نے مسافر کو ٹرین سے نیچے گرتے وقت کھینچ لیا، اس حادثے میں مسافر کے کپڑے پھٹ گئے، اور چپل ریل میں رہ گئی، لوگوں کے شور مچانے پر ٹرین ڈرائیور نے بھی ٹرین کو روک لیا تھا۔
بعد ازاں ریلوے پولیس کانسٹیبل نے مسافر سہیل کو بہ حفاظت دوبارہ ٹرین میں سوار کرایا۔
