کراچی : محکمہ ریلوے پولیس میں بھرتی کیلیے انتظامیہ کو دھوکہ دینے والا ملزم اور اصل امیدوار رنگے ہاتھوں پکڑے گئے۔
نمائندہ اے آر وائی نیوز کی رپورٹ کے مطابق پاکستان ریلوے پولیس میں بھرتی کے لیے ٹیسٹ دینے والا جعل ساز اصل امیدوار سمیت گرفتار کرلیا گیا۔
ملزم خضر اصل امیدوار احسن اقبال کی جگہ امتحان دینے ٹیسٹ سینٹر آیا تھا، دوڑ مکمل ہونے کے بعد کمیٹی نے کاغذات کی جانچ پڑتال کی تو امیدوار جعلی نکلا۔
ملزم خضر نے اصل امیدوار کا رول نمبر اور شناختی کارڈ دیا جو مختلف نکلا، کمیٹی نے ملزم کی نشاندہی پر اصل امیدوار احسن کو بھی موقع پر گرفتار کرلیا۔
امیدوار نے تفتیس میں انکشاف کیا اس نے خضر کو بھرتی دوڑ میں شرکت کیلئے معاوضے کے طور پر 50ہزار روپے دیئے۔
دونوں ملزمان کے خلاف تھانہ ریلویز پولیس مغل پورہ ورکشاپس میں مقدمہ درج کرلیا گیا ہے، جعل ساز ملزم سے دیگر ساتھیوں کی نشاندہی اور وارداتوں کے لیے تفتیش کی جارہی ہے۔
