لاہور: صوبہ پنجاب کے دارالحکومت لاہور سمیت پنجاب کے مختلف علاقوں میں موسلا دھار بارش سے موسم خوشگوار ہوگیا۔
تفصیلات کے مطابق لاہور سمیت پنجاب کے مختلف شہروں میں بارش سے موسم خوشگوار ہوگیا اور ٹھنڈی ہوائیں چلنے سے گرمی کی شدت میں بھی کمی واقع ہوئی ہے۔
لاہور، پتوکی، مرید کے حافظ آباد، ٹبہ سلطان پور، فورٹ عباس، فیصل آباد، سکھیکی ، پنڈی بھٹیاں، جڑانوالہ، پاکپتن اور میرپور آزاد کشمیر میں موسلادھار بارش سے نشیبی علاقے زیرآب آگئے، متعدد فیڈر بھی ٹرپ کر گئے۔
محکمہ موسمیات کے مطابق کشمیر، گلگت بلتستان اور اطراف کے پہاڑی علاقوں میں بھی آندھی اور گرج چمک کے ساتھ بارش متوقع ہے جبکہ سندھ میں گرمی کی شدت برقرار رہے گی جبکہ بلوچستان کے بھی بیشترحصوں میں موسم گرم رہے گا۔
یاد رہے کہ گزشتہ ہفتے ملک کے بیشترحصوں میں بارش اور تیز آندھی کے باعث متعدد افراد جاں بحق اور کئی زخمی ہوگئے تھے
محکمہ موسمیات کے مطابق پشاور، سوات، اٹک، کامونکی، مری، منڈی شاہ جیونہ، گجرات، راولپنڈی اور دیگر کئی شہروں میں تیز آندھی اور ہوا کے ساتھ بارش ہوئی تھی۔
