لندن: کیا بارش ورلڈ کپ 2019 کے حسن کو گہنا دے گی؟ شائقین میں تشویش کی لہر دوڑ گئی.
تفصیلات کے مطابق بارش کرکٹ کے سب سے بڑے میلے کو شدید متاثر کر رہی ہے. یکے بعد دیگرے میچز بارش کی زد میں آرہے ہیں.
پاکستان اور سری لنکا کے اہم مقابلے کے بعد اب جنوبی افریقا اور ویسٹ انڈیز کا میچ بھی بارش کے باعث منسوخ ہوچکا ہے.
ماہرین ماحولیات کے مطابق انگلینڈ میں بارہ ماہ بارش کا امکان ہوتا ہے، ایسے میں آئی سی سی کو ایونٹ کے میزبان کا تعین کرنے سے قبل اس پہلو کا خصوصی طور پر جائزہ لینا چاہیے تھا، مگر شاید اس ضمن میں غفلت برتی گئی.
اندیشہ ظاہر کیا جا رہا ہے کہ آنے والے کئی میچز بارش سے متاثر ہوسکتے ہیں، جب کہ مزید میچز کی منسوخی کا بھی خدشہ ہے.
سوشل میڈیا پر بارش کو آئی سی سی ورلڈکپ کی گیارہویں ٹیم قرار دیا جارہا ہے، شائقین کو تشویش ہے کہ کہیں یہی ٹیم ورلڈ ٹرافی اپنے نام نہ کر لے.
بارش سے ٹیموں کو نقصان ہورہا ہے، ڈک ورتھ لوئس قانون سے کمزورٹیم بھی فائدہ اٹھا رہی ہے۔
