کراچی : شہر قائد میں گزشتہ روز موسلا دھار بارش کے بعد کراچی میں ہرطرف پانی ہی پانی ہوگیا، کئی گھنٹے گزرنے کے باوجود متعدد علاقوں میں پانی تاحال موجود جبکہ کچھ مقامات پر پانی اتر گیا۔
تفصیلات کے مطابق کراچی شہر کی اہم شاہراہوں پر گزشتہ روز بارش سے جمع پانی اترگیا جبکہ صدر کے علاقے موبائل مارکیٹ، ایمپریس مارکیٹ کے قریب برساتی پانی موجود ہے، ایم اےجناح روڈ، تبت سینٹر، برنس روڈ پر بھی بارش کا پانی جگہ جگہ کھڑا ہے۔
اس کے علاوہ ملیر کالا بورڈ، یونیورسٹی روڈ، ناگن چورنگی پربارش کا پانی ( آخری اطلاعات تک )اب بھی موجود ہے، ٹریفک پولیس حکام کا کہنا ہے کہ کاٹھور ندی میں طغیانی ختم ہونے کے بعد لنک روڈ پر ٹریفک کو بحال کردیا گیا ہے، رات گئے برساتی ریلا گزرنے کے باعث کاٹھور لنک روڈ بند کیا گیا تھا۔
دوسری جانب شارع فیصل پر مختلف مقامات پرموجود بارش کا پانی صاف کردیا گیا، عبداللہ ہارون روڈ، لکی اسٹار کے مقام پر بارش کا پانی نکال لیا گیا اور گورنرہاؤس سے متصل سڑک، زینب النسااسٹریٹ صدر سے بھی پانی صاف کردیا گیا ہے۔
کراچی میں صبح کےوقت مطلع ابرآلود اور موسم خوشگوار ہوگیا، محکمہ موسمیات کی جانب سے آج مطلع ابرآلود رہنے اور بوندا باندی کی پیشگوئی کی گئی ہے، کراچی میں زیادہ سے زیادہ درجہ حرارت 35 ڈگری تک جانے کا امکان ہے۔
مزید پڑھیں: کراچی میں بارش، کرنٹ لگنے سے 4 افراد جاں بحق،1 زخمی
محکمہ موسمیات کے مطابق مون سون کے تیسرے اسپیل کے دوسرے روز شہر میں سب سے زیادہ بارش گلستان جوہر، یونیورسٹی روڈ میں 78.5 ملی میٹر اور سرجانی میں 68.4 ملی میٹر ریکارڈ کی گئی۔
یاد رہے کہ ڈائریکٹر محکمہ موسمیات سردار سرفراز نے 23 جولائی کو کہا تھا کہ مون سون سیزن کے تیسرے سلسلے میں 26 اور 27 جولائی کو کراچی میں گرج چمک کے ساتھ تیز بارش متوقع ہے۔
