اسلام آباد : محکمہ موسمیات نے ملک کے مختلف حصوں میں آج آندھی، ژالہ باری اور تیز بارش کی پیشگوئی کرتے ہوئے کہا کہ بالائی سندھ اور بلوچستان میں شام کے وقت آندھی اور بارش کا امکان ہے۔
تفصیلات کے مطابق ملک کے مختلف علاقوں میں آج بھی بادل برسنے کیلئے تیار ہیں، محکمہ موسمیات نے آئندہ چوبیس گھنٹے کے دوران،کوئٹہ، لاہور، اسلام آباد اور پشاور سمیت بیشتر علاقوں میں کہیں ہلکی کہیں تیز بارش کی پیشگوئی کی ہے۔
محکمہ موسمیات کی جانب سے کہا گیا کہ اسلام آباد،خطہ پوٹھوہار،پنجاب،خیبرپختونخوا،گلگت بلتستان اور کشمیر میں آندھی اور گرج چمک کے ساتھ بارش کا امکان ہے۔
بعض مقامات پر موسلادھار بارش اور ژالہ باری بھی متوقع ہے جبکہ بالائی سندھ اور بلوچستان میں شام کے وقت آندھی اور بارش کا امکان ہے۔
لاہور میں جمعرات اور جمعہ کی درمیانی شب ہونے والی بارش کے باعث درجہ حرارت میں کمی واقع ہوئی ہے، محکمہ موسمیات کے مطابق آج دوپہر میں بھی ہلکی بارش کا امکان ہے۔
مزید پڑھیں : گرج چمک کے ساتھ طوفانی بارش کی پیش گوئی، الرٹ جاری
گذشتہ روز پی ڈی ایم اے پنجاب نے بارشوں کے حوالے سے الرٹ جاری کیا تھا، ترجمان نے کہا کہ پنجاب میں گرج چمک کےساتھ طوفانی بارش کاامکان ہے، بارشوں کا سلسلہ 4مئی تک جاری رہےگا۔
الرٹ میں کہا گیا تھا کہ 3 روزمیں آسمانی بجلی گرنے کے خدشات ہیں، گزشتہ شب آندھی،طوفان اوربارش سے2افرادجاں بحق،24زخمی ہوئے، طوفان کےباعث 9عمارتوں کوجزوی نقصان پہنچا۔
پی ڈی ایم اے نے خبردار کیا تھا کہ مری اور گلیات میں لینڈسلائیڈنگ ہوسکتی ہے، انتظامیہ الرٹ رہے۔
