تحریر: ملک شعیب
آئیے یہ اہم بات جاننے کی کوشش کرتے ہیں کہ بارش کا عمل، سمندری ہوائیں، نمی اور ہوا کا دباؤ کیا ہوتا ہے؟
ہمارے سیارے زمین کا موسم سب مقامات پر یکساں ہر گز نہیں ہوتا۔ سمندر، ریگستان، پہاڑ اور ہموار سطح پر موسموں کے مختلف پیٹرنز بنتے ہیں۔ زمین پر موسموں کا نظام نہایت پیچیدہ اور نازک ہے، جہاں ہوا کا دباؤ، درجہ حرارت، نمی اور سمندری ہوائیں ایک دوسرے پر اثر انداز ہوتے ہیں۔ ان تمام عناصر کا بارش، گرمی اور ہوا کے نظام سے گہرا تعلق ہے۔
بارش کے بننے کا عمل
بارش کا عمل ایک خاص قسم کے فضائی دباؤ، جسے ’’Low Pressure‘‘ (کم دباؤ) کہا جاتا ہے، سے ہوتا ہے۔ جب کسی علاقے میں ہوا گرم ہو کر ہلکی ہو جاتی ہے، تو وہ اوپر اٹھتی ہے۔ یہ اُٹھتی ہوئی ہوا ساتھ میں نمی بھی لے جاتی ہے۔ جیسے جیسے یہ ہوا بلندی پر پہنچتی ہے، وہ ٹھنڈی ہونے لگتی ہے، اور اس میں موجود بخارات پانی کے قطروں میں بدل جاتے ہیں۔ یہی قطرے مل کر بادل بناتے ہیں، اور جب بادل بھاری ہو جاتے ہیں تو بارش کا سبب بنتے ہیں۔
ہائی پریشر زون
زیادہ دباؤ ’’High Pressure‘‘ والے علاقوں میں ہوا اوپر سے نیچے کی طرف آتی ہے اور یہ عام طور پر خشک ہوتی ہے۔ اس عمل میں بخارات اوپر نہیں جا پاتے جس کی وجہ سے بادل نہیں بنتے۔ لیکن اگر فضا میں پہلے سے نمی موجود ہو (خاص طور پر ساحلی علاقوں میں) تو وہ نمی زمین کے قریب جمع ہو جاتی ہے جس کی وجہ سے گھٹن اور حبس زیادہ محسوس ہوتا ہے۔
سمندری ہوائیں اور بادل
زمین اور سمندر کے درجہ حرارت کے فرق سے ہوا کا رخ بنتا ہے۔ گرمیوں میں دن کے وقت زمین کی سطح جلد گرم ہو جاتی ہے، جب کہ سمندر کی سطح نسبتاً ٹھنڈی رہتی ہے۔ گرم ہوا ہلکی ہو کر زمین سے اوپر اٹھتی ہے جب کہ سمندر سے ٹھنڈی اور مرطوب ہوا زمین کی طرف چلتی ہے، جسے Sea Breezes (سمندری ہوائیں) کہتے ہیں۔ یہ ہوائیں نمی لے کر آتی ہیں اور جب یہ خشکی پر آ کر گرم فضا سے ملتی ہیں تو بادل بنتے ہیں اور بارش ہوتی ہے۔
گرمیوں میں رات کے وقت زمین کی سطح جلد ٹھنڈی ہو جاتی ہے، جب کہ سمندر آہستہ ٹھنڈا ہوتا ہے۔ لہٰذا، گرم ہوا سمندر سے اوپر اٹھتی ہے اور زمین کی طرف سے ٹھنڈی ہوا سمندر کی طرف سفر کرتی ہے، جسے Land Breezes (زمینی ہوائیں) کہتے ہیں۔
ہواؤں کا رک جانا اور نمی کا بڑھ جانا
کبھی کبھار ایسا ہوتا ہے کہ سب ٹراپیکل رج (Subtropical Ridge) (ہائی پریشر زون) کی وجہ سے مون سون ہوائیں رک جاتی ہیں، بادل بننا بند ہو جاتے ہیں اور درجہ حرارت کے ساتھ ساتھ نمی بھی بڑھنے لگتی ہے، جو سمندری ہواؤں کو روک دیتی ہے۔ اس دوران زمین کی سطح گرم رہتی ہے، لیکن بارش نہ ہونے کی وجہ سے ماحول مرطوب اور گھٹن زدہ ہو جاتا ہے۔
