کراچی: شہر قائد کے مختلف علاقوں میں صبح سویرے ہونے والی بارش سے موسم خوشگوار ہوگیا، ٹھنڈی ہواؤں سے شہریوں کے چہرے کھل اٹھے اور شہری گھروں سے باہر نکل آئے۔
تفصیلات کے مطابق کراچی کے مختلف علاقوں میں آج صبح سے ہی بارش کا سلسلہ جاری ہے، بارش کے باعث موسم سہانا ہوگیا۔
محکمہ موسمیات کے مطابق ایف بی ایریا، نیوکراچی، کلفٹن، ڈیفنس، میٹھادر، کھارادر، ٹاور، صدر، گلشن اقبال، شاہراہ فیصل، یونیورسٹی روڈ، ڈاک خانہ، ناظم آباد، نارتھ ناظم آباد، سائٹ ایریا سمیت اطراف میں بارش سے موسم خوشگوار ہوگیا۔
محکمہ موسمیات کے مطابق کراچی میں صبح سویرے 26 ڈگری سینٹی گریڈ ریکارڈ کیا گیا، ہوا میں نمی کا تناسب 77فیصد اور 26 کلومیٹر فی گھنٹہ کی رفتار سے ہوا چل رہی ہے۔
دوسری جانب کراچی میں ابوالحسن اصفحانی روڈ کے قریب بھکرگوٹھ کے قریب چھت گرگئی جس کے نتیجے میں 4 افراد زخمی ہوگئے۔ ریسیکو ذرائع کے مطابق زخمیوں کو طبی امداد کے لیے عباسی شہید اسپتال منتقل کردیا گیا۔
ادھر حیدرآباد شہر میں بارش کے باعث حیسکو ریجن کے 89 فیڈر مکمل طور پر بند ہوگئے، بجلی نہ ہونے کے باعث ایچ ڈی اے کو نکاسی میں شدید مشکلات کا سامنا ہے۔
کراچی، بارش کے دوران مختلف واقعات میں 8 افراد جاں بحق، 6 افسران معطل
یاد رہے کہ گزشتہ روز شہر قائد میں بارش کے دوران مختلف واقعات میں 8 افراد جاں بحق ہوگئے تھے اور رین ایمرجنسی میں غفلت برتنے پر 6 افسران کو معطل کردیا گیا۔
