لاہور : رائے ونڈ مارچ کی تیاریاں زور و شور سےجاری ہیں، پی ٹی آئی نے اڈا پلاٹ سےٹھوکر نیاز بیگ کے روٹ کو سجانے کا فیصلہ کرلیا ہے۔
تفصیلات کے مطابق تیس ستمبر کو رائے ونڈ مارچ کیلئے تحریک انصاف کی بھرپور تیاریاں جاری ہے، پی ٹی آئی نے اڈہ پلاٹ سے ٹھوکر نیاز بیگ کے روٹ پر بینرز ،فلیکسز ،پوسٹرز، کپتان کی تصاویر کے ہورڈنگ کی سجاوٹ کا فیصلہ کیا ہے، تحریک انصاف نے مارچ کے لئے حکمت عملی فائنل کرلی ہے۔
ذرائع کے مطابق کارکنوں کی آسانی کے لیے روٹ کا نقشہ جاری ہوگا، مارچ کا پہلا انٹری پوائنٹ قزلباش چوک ہوگا، بھوبتیاں چوک مارچ کے قافلوں کا دوسرا انٹری پوائنٹ ہوگا، گجومتہ ،کاہنہ فلائی اوور ،ڈیفنس روڈ تیسرا انٹری پوائنٹ ہوگا۔
ٹھوکر نیاز بیگ اور کالاشاہ کاکو موٹر وے سے آنے والی ٹریفک کا داخلی راستہ قزلباش چوک ہوگا، شاہدرہ سے جی ٹی روڑ کے ذریعے آنے والے قافلے بھی کالاشاہ کاکو سے قزلباش چوک پہنچیں گے، ملتان جی ٹی روڑ سے آنے والےقافلے بھو بھتیاں چوک سے رائے ونڈ روڈ پر آئیں گے۔
قافلے رائے ونڈ پہنچنے کے لیے فیروز پور روڑ کو بھی استمعال کریں گے، گجومتہ،کاہنہ فلائی اوور سے ہوتے ہوئے ڈیفنس روڈ سے قافلے رائے ونڈ روڑ پر آئیں گے، رائے ونڈ ،قصور سے آنے والے قافلے نیو رنگ روڑسے ہوکر ڈیفنس روڈ کی جانب سے آئیں گے۔
مزید پڑھیں: پاکستان بھر سے لوگ 30 ستمبر کو رائے ونڈ پہنچیں، عمران خان
واضح رہے کہ سربراہ تحریک انصاف عمران خان نے 30 ستمبر کو رائے ونڈ میں احتجاج کا اعلان کرتے ہوئے پاکستان بھر کے عوام سے رائے ونڈ پہنچنے کی درخواست کی ہے۔
