نئی دہلی : بھارت نے اپنے فوجی کے پکڑے جانے کی تصدیق کردی ہے ، بھارتی وزیر داخلہ کا کہنا ہے کہ پاکستان سے بھارتی اہلکار کو چھڑانے کیلئے اقدامات کریں گے۔
بھارتی وزیر داخلہ کا کہنا ہے کہ بھارتی اہلکاروں اور شہریوں کا غلطی سے سرحدپار کرنا معمول کی بات ہے، غلطی سے سرحد پار کے طریقہ کار سے واپس بھیج دیا جاتا ہے، پاکستان سے بھارتی اہلکار کو چھڑانے کیلئے ہر ممکن کوشش کی جارہی ہے۔
دوسری جانب بھارتی میڈیا کے مطابق بھارت نے اپنے فوجی کے پکڑے جانے کی تصدیق کردی ہے، پکڑے گئے چندو بابو لال چوہان کا تعلق راشٹریہ رائفلز سے ہے، بھارتی فوجی چندوبابولال ایل او سی پر دراندازی کی کوشش میں پکڑا گیا تھا۔
مزید پڑھیں : پاکستان نے دراندازی کرنے والی بھارتی فوجی کو پکڑلیا
پاکستانی فوج نے ایل او سی پر کاروائی کرتے ہوئے ایک بھارتی فوج کو گرفتار کرلیا تھا، گرفتار بھارتی فوجی کی شناخت چندو بابو لال کےنام سےہوئی، دوران تفتیش چندوبابولال نے بتایا کہ پاک فوج کی چوکی کوتباہ کرنے کا ٹاسک ملاتھا۔
بائیس سالہ بابو لال کاتعلق اکیاسی آرمررجمنٹ سےہے، وہ ایک سال چار ماہ سےایل او سی پرتعینات تھا، چندو بابو لال کو اسلحے اور بارود سمیت پکڑا گیا جبکہ یونٹ کے پندرہ سپاہیوں کے ساتھ نکیال سیکٹرمیں دراندازی کی کوشش کی تو پاک فوج کی کارروائی میں چھ بھارتی فوجی مارے گئے۔
مزید پڑھیں : بھارتی فوج کی بلااشتعال فائرنگ، 2 فوجی اہلکار شہید
یاد رہے کہ گذشتہ روز ہندوستان کی جانب سے لائن آف کنٹرول پر بھمبھر، کیل، تتہ پانی اور لیپا سیکٹر میں بلااشتعال فائرنگ کی گئی تھی، جس کا پاک فوج نے منہ توڑ جواب دیا، اس واقعہ میں پاک فوج کے 2 اہلکار جاں بحق ہوگئے تھے۔
ایل او سی پر فائرنگ بعد ہی بھارتی ڈائریکٹر جنرل ملٹری آپریشنز لیفٹیننٹ جنرل رنبیر سنگھ نے دعویٰ کیا تھا کہ بھارتی فورسز نے لائن آف کنٹرول پر سرجیکل اسٹرائیکس کیں۔
مزید پڑھیں : پاکستان نے سرجیکل اسٹرائیک کے بھارتی دعوی کو مسترد کردیا
تاہم آئی ایس پی آر نے لائن آف کنٹرول پر سرجیکل اسٹرائیکس کا بھارتی دعویٰ مسترد کرتے ہوئے ایسے جھوٹ اور بے بنیاد قرار دیا تھا۔
