لاہور: قائم مقام گورنر پنجاب چوہدری پرویز الہیٰ کا کہنا ہے کہ تمام اپوزیشن عوامی مفاد کے منصوبوں میں حکومت کا ساتھ دے۔
تفصیلات کے مطابق لاہور میں قائم مقام گورنر پنجاب چوہدری پرویز الہیٰ سے وزیر قانون پنجاب راجہ بشارت نے ملاقات کی جس میں پنجاب اسمبلی میں قانون سازی پر تبادلہ خیال کیا گیا۔ملاقات میں پنجاب اسمبلی کے 9 مارچ کو تجویز کردہ اجلاس میں قانون سازی ودیگر ایجنڈے پر مشاورت کی گئی۔
اس موقع پر چوہدری پرویز الہیٰ کا کہنا تھا کہ حکومتی اقدامات سے اشیائے ضروریہ کی قیمتوں میں کمی آنا شروع ہوگئی، وفاق پنجاب کی اتحادی حکومت عوام کو ریلیف دینے کے لیے اقدامات اٹھائے گی،تمام اپوزیشن عوامی مفاد کے منصوبوں میں حکومت کا ساتھ دے۔
انہوں نے کہا کہ بھارت، کشمیر میں مسلمانوں کی نسل کشی، مظالم شرمناک ہیں، ایران ودیگر ممالک کا بھارتی اقدامات کے خلاف ردعمل اہم ہے،عالمی برادری بھارت کو مسلمانوں کے خلاف مظالم سے روکے۔
چوہدری پرویز الہیٰ کا کہنا تھا کہ مودی گجرات کے بعد دہلی میں ظلم کی نئی تاریخ رقم کر رہا ہے، مقبوضہ کشمیر میں بھی بھارتی مظالم کا عالمی برادری نوٹس لے، حکومت بھرپور انداز سے بھارتی مظالم کو بے نقاب کر رہی ہے۔
دوسری جانب وزیر قانون پنجاب راجہ بشارت کا کہنا تھا کہ اجلاس میں اورنج لائن کے کرایے پر تمام جماعتوں کی ان پٹ لیں گے، اورنج لائن کرایہ مقرر کرنے سے متعلق سیاسی مشورے کھلے دل سے سنیں گے۔
