اسلام آباد : تحریک انصاف نے راجہ ریاض کواپوزیشن لیڈر بنانے کا نوٹی فکیشن چیلنج کردیا، جس میں کہا راجہ ریاض کو تحریک انصاف کی مشاورت کے بغیر اپوزیشن لیڈر مقرر کیا گیا۔
تفصیلات کے مطابق پاکستان تحریک انصاف نے قومی اسمبلی میں اپوزیشن لیڈر راجہ ریاض کو ہٹانے کے لیے سپریم کورٹ سے رجوع کرلیا۔
درخواست میں کہا گیا کہ راجہ ریاض کو تحریک انصاف کی مشاورت کے بغیر اپوزیشن لیڈر مقرر کیا گیا، انہیں قواعد و ضوابط کو نظرانداز کرتے ہوئے موجودہ حکومت کی ملی بھگت سے اپوزیشن لیڈر بنایا گیا۔
دائر درخواست میں استدعا کی گئی کہ الیکشن کمیشن ممبر بابر بھروانہ اور اکرام اللہ کی تعیناتی غیر آئینی قرار دی جائے۔
پاکستان تحریک انصاف (پی ٹی آئی) کے منحرف ایم این اے راجہ ریاض کو اس سال مئی میں قومی اسمبلی میں اپوزیشن لیڈر مقرر کیا گیا تھا جب پی ٹی آئی کے 125 ایم این ایز نے اپنی اسمبلی سے استعفیٰ دے دیا تھا۔
