کراچی: چیئرمین رویت ہلال کمیٹی نے اعلان کیا ہے کہ رجب المرجب کا چاند نظر نہیں آیا، یکم رجب 26 فروری کو ہوگی۔
تفصیلات کے مطابق کراچی کے محکمہ موسمیات کے مرکزی دفتر میں چیئرمین رویت ہلال کمیٹی مفتی منیب الرحمان کی زیر صدارت رویت ہلال کمیٹی کا اجلاس ہوا جس میں ماہرین فلکیات بھی شریک تھے۔
رویت ہلال کمیٹی کی زونل کمیٹٰوں کے اجلاس لاہور، اسلام آباد، پشاور اور کوئٹہ میں بھی منعقد ہوئے، اس دوران ملک کے کسی بھی علاقے سے چاند کی رویت کی شہادت موصول نہیں ہوئی۔
مفتی منیب الرحمان نے کہا کہ کل بروز منگل 30 جمادی الثانی ہوگی، یکم رجب 26 فروری بروز بدھ کو ہوگی جبکہ شبِ معراج 22 مارچ اتوار اور پیرکی درمیانی شب ہوگی۔
سفرِسدرۃ ُالمنتہیٰ، دیدارِِ ربُ العالمین ، معراج مصطفٰی ﷺ
معراج کی شب کو دین اسلام میں نمایاں اور منفرد مقام حاصل ہے کیونکہ اس روز اللہ رب العزت نے اپنے محبوب حضرت محمد صلی اللہ علیہ وآلہ وسلم کو عرشِ معلہٰ پر اپنے پاس بلا کر اپنا دیدار کرایا ۔
حرمت والا مہینہ، جنگ و قتال منع:
لفظ رجب، ترجیب سے نکلا جس کے معنی تعظیم کے ہیں، رجب المرجب ہجری کلینڈر کا ساتواں مہینا ہے، یہ حرمت والے چار ماہ میں شامل ہے، دین اسلام میں اس ماہ میں بھی جنگ اور قتل کرنے کی ممانعت ہے،اس ماہ میں توبہ جلد قبول ہوتی ہے اس ماہ کا ایک نام الاصب بھی ہے جس کے معنی ہیں تیز بہاؤ، یعنی توبہ جلد قبول ہوتی ہے۔
