واشنگٹن : ترک صدر رجب طیب اردگان نے کہا ہے کہ ہم امریکا سے نئے تعلقات کی بنیاد رکھ رہے ہیں اور دونوں ممالک کے درمیان معاشی تعاون خطے کے لیے مفید ہے۔
تفصیلات کے مطابق آج امریکی صدر ڈونلڈ ٹرمپ اور ترک صدر رجب طیب اردوان کے درمیان ملاقات واشنگٹن وائٹ ہاوس میں ہوئی جس میں خطے کی صورت حال اور باہمی دلچسپی کے امور پر تبادلہ خیال کیا گیا۔
ملاقات کے بعد ترک صدر طیب اردگان کا امریکی صدر کیساتھ پریس کانفرنس کرتے ہوئے کہنا تھا کہ ہم امریکا سے نئے تعلقات کی بنیاد رکھ رہے ہیں جس کے لیے ترکی اور امریکا میں معاشی دفاعی تعاون بڑھانے اور مشترکہ مفادات پر اتفاق ہوا ہے۔
ترک صدر نے مزید کہا کہ مشرق وسطی میں امریکا کے ساتھ تعاون دنیا کے لیے بہت ضروری ہے اور ترک اپنے دوست ملکوں کے ساتھ برادرانہ تعلقات پر یقین رکھتا ہے۔
دوسری جانب ڈونلڈ ٹرمپ کا ترک صدر کو داعش کے خلاف جنگ میں تعاون کی پیشکش کرتے ہوئے کہنا تھا کہ امریکا ترک کو فوجی سازوسامان کی جلد فراہمی کو ممکن بنائے گا۔
