شوبز انڈسٹری کی معروف جوڑی ریمبو اور صاحبہ کی پیٹرول کی بڑھتی قیمت پر دلچسپ ویڈیو سوشل میڈیا پر وائرل ہوگئی۔
اداکار ریمبو اور ان کی اہلیہ اداکارہ صاحبہ نے پیٹرول کی بڑھتی قیمت پر دلچسپ ویڈیو بنائی جو مختلف سوشل میڈیا پلیٹ فارم پر وائرل ہورہی ہے اور مداحوں کی جانب سے ویڈیو کو پسند کیا جارہا ہے۔
ویڈیو میں صاحبہ ریمبو سے کہتی ہیں کہ "جلدی کریں مجھے دیر ہورہی ہے آپ نے پیٹرول بھروا لیا ہے۔”
ریمبو کہتے ہیں کہ "ہاں ہاں ٹنکی فُل کروائی ہے ٹنکی آجاو۔”
صاحبہ ریمبو کے ساتھ جانے لگتی ہیں اور گاڑی کا دروازہ کھول ہی رہی ہوتی ہیں کہ ریمبو کہتے ہیں کہ ادھر آو ادھر۔
وہ جیسے ہی آگے جاتی ہیں تو موٹر سائیکل کھڑی ہوتی ہے پھر ریمبو کہتے ہیں کہ "آج کل ٹنکی صرف اسی کی فل ہوسکتی ہے۔” پھر دونوں بیٹھ کر چلے جاتے ہیں۔
View this post on Instagram
واضح رہے کہ اس سے قبل شان شاہد، صبور علی، منیب بٹ، فہد شیخ ودیگر اداکار بھی حکومت کو پیٹرول کی قیمت بڑھانے پر تنقید کا نشانہ بناچکے ہیں۔
یاد رہے کہ چند روز قبل وفاقی وزیر خزانہ مفتاح اسماعیل نے پیٹرولیم مصنوعات کی قیمتوں میں اضافے کا اعلان کرتے ہوئے بتایا کہ پیٹرول کی فی لیٹر قیمت میں 24.03 روپے اضافہ کیا جارہا ہے جب کہ ڈیزل پر 59.16 روپے، لائٹ ڈیزل آئل پر 39.16 روپے اور مٹی کے تیل کی قیمت میں 39.49 روپے فی لیٹر اضافہ کیا جارہا ہے۔
پیٹرولیم مصنوعات کی قیمتوں میں اضافے کے بعد عوام کی جانب سے حکومت پر سخت تنقید کی جارہی ہے اور سوشل میڈیا صارفین بھی میمز بنا کر حکومت پر طنز کررہے ہیں۔
