غزہ: ماہ صیام کی آمد آمد ہے اور بالعموم پورے فلسطین اور بالخصوص مقبوضہ بیت المقدس اور مسجد اقصیٰ میں رمضان المبارک کی تیاریاں پورے مذہبی جوش وجذبے کے ساتھ جاری ہیں۔
تفصیلات کے مطابق مرکز اطلاعات فلسطین کا کہنا ہے کہ ‘القدس یوتھ کمیٹی’ کے زیر اہتمام بیت المقدس میں ماہ صیام سے قبل انتظامات حتمی مراحل میں ہیں۔
غیر ملکی خبر رساں ادارے کا کہنا ہے کہ مسجد اقصیٰ میں ماہ صیام کے دوران ضیوف الرحمان کے استقبال کے لیے تزئین و آرائش کی جا رہی ہے۔
مسجد اقصیٰ کے مرکزی مقامات، گزرگاہوں، گیلریوں اور راہ داریوں پر جشن ماہ صیام اور استقبال رمضان کے حوالے سے خصوصی بینرز لگائے گئے۔
پرانے بیت المقدس، حارات، باب حطی، السعیدیہ، والواد، حاریالنصاریٰ اور دیگر مقامات پر تزئین وآرائش کی گئی ہے۔
القدس یوتھ کمیٹی کے چیئرمین ناصر قوس کی قیادت میں عمادالشلودی، عاھد الرشق، ریاض الشھابی، فرید الباسطی، علاءالحداد، باسم جابر، الیاس کارمی، ھیثم حجازی، یاسر نجیب اور انڈریہ بحبح استقبال رمضان کی تیاریوں کے لیے سرگرم ہیں۔
انتظامی کمیٹی نے ماہ صیام کے دوران مسجد اقصیٰ میں صفائی، نمازیوں اور روزہ داروں کی سہولیات کے لیے مختلف سرگرمیوں، افطاری اور سحری کے اوقات میں روزہ داروں کی خدمت بجا لانے کے لیے رضاکاروں کا تعین کیا گیا ہے۔
