کراچی : ماہ رمضان میں مہنگائی کنٹرول کرنے کیلئے سندھ حکومت نے صوبائی وزراء کی ڈیوٹی لگانے کا فیصلہ کیا ہے۔
اس حوالے سے تمام صوبائی وزراء کو بچت بازاروں کا دورہ کرکے سرکاری نرخ پر عمل درآمد یقینی بنانے کی ہدایت کی گئی ہے۔
جن وزراء کو کراچی کے بازاروں میں صورتحال کا جائزہ لینے کی ہدایت کی گئی ان میں سردار شاہ، سعید غنی، ذوالفقار شاہ، اللہ ڈنو بھیو شامل ہیں جبکہ احسان مزاری اور نجمی عالم بھی کراچی ڈویژن میں دورے کریں گے۔
اس کے علاوہ صوبائی وزیر ضیاء لنجار، علی حسن زرداری کو شہید بنظیر آباد ڈویژن میں مارکیٹوں کے دورے کرنے کی ہدایت جاری کی گئی ہے۔
ذرائع کے مطابق سید ناصر شاہ اور محمد بخش مہر سکھر اور لاڑکانہ میں رمضان بچت بازاروں میں قیمتوں کا جائزہ لیں گے۔
علاوہ ازیں صوبائی وزیر جام خان شورو اور ضیاء الحسن لنجارحیدرآباد ، میرپورخاص میں بچت بازاروں کا جائزہ لیں گے۔
