ماہ رمضان میں کھانے پینے میں بے احتیاطی کرنے سے سینکڑوں افراد گیسٹرو کی بیماری میں مبتلا ہوجاتے ہیں جس کیلیے ضروری ہے کہ سحر و افطار میں زیادہ اور بے ترتیب کھانے سے اجتناب کرنا چاہیے۔
افطاری ہو یا سحری کھانے پینے میں احتیاط نہ برتنے سے ڈائریا، گیسٹرو اور معدے کے دیگر امرض بڑھنے کا قوی امکان ہوجاتا ہے جس سے مریضوں کو شدید مشکلات اور تکالیف کا سامنا کرنا پڑتا ہے۔
اس حوالے سے ماہرین صحت کا کہنا ہے کہ بلڈ پریشر، شوگر اور گردوں کے مریضوں کو پانی کا زیادہ استعمال اور سحری و افطاری میں تازہ پھل اور سبزیوں کے ساتھ دہی کا استعمال کرنا چاہئے۔
ماہرین کا کہنا ہے کہ روزے کے دوران قبض، ہاضمے کی خرابی اور تیزابیت ہو جانا عام سی بات ہے۔ ان مسائل سے بچنے کے لیے یہ اہم ہے کہ جو لوگ کسی سنگین مرض کا شکار ہیں تو ماہ رمضان میں اپنے معالج سے غذا کا چارٹ اور طریقہ استعمال بنوائیں۔
اس کے علاوہ ادویات سے متعلق خود سے کوئی فیصلہ نہ کریں اور اپنی ادویات کو معالج کے مشورے سے باقاعدہ استعمال کریں تاکہ بہترین طریقے سے رمضان کے روزے رکھ سکیں۔
