فیصل آباد : وزیرداخلہ رانا ثنااللہ نے کہا ہے کہ عمران خان نے نوجوانوں کو گمراہی کا سبق پڑھایا، وہ لوگوں کو تشدد کی تربیت دے رہا ہے۔

فیصل آباد میں نادرا آفس کے افتتاح کے بعد تقریب سے خطاب کرتے ہوئے وزیر داخلہ کا کہنا تھا کہ عمران خان جب وزیر اعظم تھا تو کہتا تھا کہ میں خود چیک کروں گا کہ جیل میں ان کو کوئی سہولت تو نہیں مل رہی۔

انہوں نے کہا کہ عمران خان کو جیل کا اتنا خوف ہے کہ لوگوں کو تشدد کی ٹریننگ دے رہا ہے۔ عمران خان نے لوگوں کو ورغلایا کہ مجھے گرفتار کیا جائے تو تم لوگ جلاؤ گھیراؤ کرنا، عمران خان کہتے تھے کہ میری گرفتاری ریڈ لائن ہے بھرپور احتجاج کرو۔

وزیرداخلہ کا کہنا تھا کہ مختلف شہروں میں چند لوگوں نے جلاؤ گھیراؤ اور پرتشدد مظاہرے کیے، عمران خان نے جن کو ٹریننگ دی انہوں نے دفاعی تنصیبات پر حملے کیے۔

اپنے خطاب میں رانا ثناءاللہ نے کہا کہ فتنہ عمران خان نیازی نے2014سے دھرنے اور لانگ مارچ سے اپنی سیاست کا آغاز کیا اور 2018 تک لانگ اور شارٹ مارچ کرتے رہے، انہوں نے مخالفین کو گالیاں دینے کے علاوہ کوئی کام نہیں کیا۔