لاہور: منشیات اسمگلنگ کیس میں راناثنااللہ کے اہل خانہ کے بینک اکاؤنٹس کھولنے کا معاملہ اب عدالت میں زیربحث آئے گا، عدالت نے درخواست سماعت کے لیے مقرر کرلی۔
تفصیلات کے مطابق راناثنااللہ کی اہلیہ، داماد اور بیٹی کے منجمد اکاؤنٹس کے خلاف درخواست سماعت کے لیے مقرر کرلی گئی ہے، انسداد منشیات عدالت کے جج 4جنوری کو درخواست پر سماعت کریں گے۔
درخواست گزار نے عدالت سے استدعا کی ہے کہ اے این ایف نے بینک اکاؤنٹس منجمد کر رکھے ہیں، عدالت بینک اکاؤنٹس کھولنے کا حکم دے۔ انسداد منشیات عدالت میں ہونے والی سماعت میں اہم پیشرفت ممکن ہے۔
دوسری جانب لاہور ہائی کورٹ نے منشیات اسمگلنگ کیس سے متعلق رانا ثنااللہ کی درخواست ضمانت پر فیصلہ محفوظ کرلیا ہے، عدالت کی جانب سے فیصلہ آج سنایا جائے گا، لاہور ہائی کورٹ کے جسٹس چودھری مشتاق احمد نے گزشتہ روز رانا ثنا اللہ کے خلاف منشیات اسمگلنگ کیس کی سماعت کی، رانا ثنا اللہ کو حکومت کی جانب سے دی گئی سیکیورٹی واقعے سے 13 روز قبل واپس لے لی گئی تھی۔
رانا ثنا اللہ کی درخواست ضمانت پر فیصلہ محفوظ
یاد رہے کہ یکم جولائی کو پاکستان مسلم لیگ ن کے رہنما اور سابق وزیر قانون پنجاب رانا ثنا اللہ کو اینٹی نارکوٹکس فورس (اے این ایف) نے حراست میں لیا تھا۔ اے این ایف مطابق فیصل آباد کے قریب ایک خفیہ کارروائی کے دوران گاڑی سے بھاری مقدارمیں منشیات برآمد کی گئی تھی، گاڑی سے برآمد منشیات میں ہیروئن شامل تھی۔
