اسلام آباد: وفاقی وزیر داخلہ رانا ثناللہ کا کہنا ہے کہ عمران خان اندر بیڈ کے نیچے چھپا رہے گا تو کیسے گرفتار کریں گے، اس کو جو ریلیف ملنا تھا مل چکا ، اب انجام تک پہنچانا چاہیے۔
تفصیلات کے مطابق وفاقی وزیر داخلہ رانا ثناللہ نے پریس کانفرنس کرتے پوئے کہا آج کے دن بہنوں اور خواتین کے لئے اہمیت کاحامل ہے، ایک عورت مارچ کی ایکٹیویٹی لاہوراور اسلام آباد میں ہے اور عمران خان بھی لاہور میں برگر مارچ بھی لے آیا ہے۔
رانا ثناللہ کا کہنا تھا کہ ایسی صورتحال میں لاہور میں کوئی بھی واقعہ ہوسکتاہے، فتنہ مارچ میں جوکچھ ہوتاہے اسکی وجہ سے بری صورتحال کا سامنا ہوتا ہے۔
وفاقی وزیر داخلہ نے کہا کہ ایجنسیز کی رپورٹ پر نگراں حکومت نے دفعہ144کانفاذ کیاہے، میری اطلاعات کے مطابق پی ٹی آئی کو روٹ بدلنے کا کہاگیا تھا لیکن بدبخت ٹولہ قانون کو کسی کھاتےمیں نہیں لاتا۔
انھوں نے عمران خان پر تنقید کرتے ہوئے کہا کہ ٹانگ میں پلستربھی باندھا ہے اور ریلی کو ہیڈ بھی کرنا ہے ، آپ صحت مند ہوگئے ہیں توعدالتوں کے سامنے پیش ہوں ، آپ کو ریلیف بھی مل جاتا ہے چاہے بنتا ہو یا نہیں۔
رانا ثناللہ نے کہا کہ عمران خان کے پاس سارے بہانے بھی ختم ہوچکے ہیں ، عمران خان سے زیادہ مہربانی اور شفقت کا سلوک ہوگا تو سوال ہوگا۔
وفاقی وزیر کا کہنا تھا کہ عمران خان کے پاس اپنے مقدمات میں دفاع کیلئے بھی کچھ نہیں، عمران خان عدالتوں میں پیش ہوکر منی لانڈرنگ کا اعلان کرے۔
انھوں نے عمران خان کی گرفتاری سے متعلق کہا کہ فتنہ خان اپنی انا اور ضد سے پیچھےہٹنے کوتیار نہیں ،عمران خان اندر بیڈ کے نیچے چھپا رہے گا تو کیسے گرفتار کریں گے ۔
انھوں نے بتایا کہ عدالت نے 13مارچ تک کا وقت دیا ہے امید ہے وہ پیش ہوں گے ، عمران خان اسی طرح قانون سے بھاگتے رہے تو کب تک خیر منائیں گے۔
رانا ثناللہ کا مزید کہنا تھا کہ عمران خان چھپتے رہے تو ایک نہ ایک دن گرفتارکرکے لاناپڑےگا، ان کو ریلیف دینے کے تمام عندیے اب ختم ہو چکےہیں، اگر اسکے بعدبھی ریلیف کا سلوک ہوگا توعدلیہ کی غیر جانبداری پرحرف آئے گا۔
وزیر داخلہ نے کہا کہ میرانہیں خیال 13مارچ کے بعد اس کو مزید گنجائش ملے گی، عمران خان اپنے انجام کو پہنچے گا تو ملک آگے بڑھے گا۔
ان کا کہنا تھا کہ عمران خان کو جو ریلف ملنا تھا مل چکا ، اب انجام تک پہنچاناچاہیے، یہ ہر وقت افراتفری اور انارکی کی کوشش میں ہے۔
