اسلام آباد : وزیراعظم کے مشیر رانا ثنااللہ کا کہنا ہے کہ بانی پی ٹی آئی 2 سے 3 سال تک جیل سے باہر آتے نظر نہیں آرہے۔
تفصیلات کے مطابق وزیراعظم کے مشیر رانا ثنااللہ نے اے آر وائی نیوز کو خصوصی انٹرویو میں کہا کہ بانی پی ٹی آئی 2 سے 3 سال تک جیل سے باہر آتے نظر نہیں آرہے، بہت مقدمات ہیں، بانی پی ٹی آئی کا جیل سے باہر آنابہت مشکل ہے۔
انھوں نے بتایا کہ کچھ مقدمات میں بانی پی ٹی آئی کو سزا ہوچکی اور کچھ میں ہوجائے گی۔
مذاکرات کے حوالے سے سیاسی مشیر کا کہنا تھا کہ میرا تو یقین ہے ڈائیلاگ سیاسی جماعتوں کے درمیان ہونے چاہئیں، بےشک فریقین اپنے موقف پر قائم رہیں لیکن مذاکرات ہونے چاہئیں۔
انھوں نے کہا کہ بانی پی ٹی آئی کا فلسفہ ہے وہ مخالف کو فریق نہیں بلکہ دشمن سمجھتے ہیں، پی ٹی آئی چاہتی ہے 18-2016 کی طرح ان سے معاملات طے کئے جائیں۔
عمران خان سے متعلق رانا ثنااللہ کا کہنا تھا کہ بانی پی ٹی آئی اقتدار چاہتے ہیں تاکہ پھر سے میں چھوڑوں گا نہیں شروع کردیں لیکن اس وقت تو بانی پی ٹی آئی اپنی سوچ سے کامیابی سے بہت دور ہیں۔
وزیراعظم کے مشیر نے کہا کہ ہاں ایک راستہ کھلا ہے بانی پی ٹی آئی سیاست دانوں سے بات کریں، بانی پی ٹی آئی اسٹیبلشمنٹ کی بجائے نواز شریف اورآصف زرداری سے بات کا پیغام بھیجیں، بانی پی ٹی آئی کو سمجھنا چاہیے اختیار بہرحال حکومت کا ہی ہے اور حکومت سے ہی بات کرنی ہے۔
پی ٹی آئی رہنماوں کے بیانات کے حوالے سے ان کا کہنا تھا کہ پی ٹی آئی والے ہر چیز کا ذمہ دار ہمیں ٹھہراتے ہیں اور پھر کہتے ہیں آپ کے پاس اختیارنہیں، بانی پی ٹی آئی میں صلاحیت ہے ، وہ اپنے مخالف کو اپنی مخالفت میں پوری طرح تگڑا کر دیتے ہیں۔
