اسلام آباد : وزیرداخلہ راناثناءاللہ نے کہا ہے کہ جوڈیشل کمپلیکس پرحملے کا مقدمہ درج کردیا گیا ہے، عمران خان سمیت سب کو گرفتار کیا جائے گا۔
اپنے ایک میڈیا بیان میں انہوں نے کہا کہ جوڈیشل کمپلیکس پر حملہ عمران خان کی عدالت سے اپنی مرضی کے فیصلے کرانے کی سازش ہے۔
وزیر داخلہ کا کہنا تھا کہ ایک شخص نے مسلح گروہ کے ہمراہ پورے عدالتی نظام کو یرغمال بنانے کی کوشش کی، یہ وہی شخص ہے جس کے پاس فارن فنڈنگ، توشہ خانہ کی چوری کا جواب ہے۔
راناثناءاللہ نے کہا کہ جوڈیشل کمپلیکس پر حملہ میں ملوث افراد کی سی سی ٹی وی کے ذریعے شناخت کی جارہی ہے، عمران خان سمیت سب کو گرفتار کیا جائے گا، یہ عدلیہ کی عزت و تکریم کا معاملہ ہے، کسی بھی صورت میں کوئی نرمی نہیں برتی جائے گی۔
مزید پڑھیں : جوڈیشل کمپلیکس اسلام آباد میں توڑ پھوڑ کا مقدمہ درج
یاد رہے کہ جوڈیشل کمپلیکس اسلام آباد میں توڑ پھوڑ کا مقدمہ اے ٹی اے 353/7 اور دیگر دفعات کے تحت درج کر لیا گیا ہے، ایف آئی آر میں کہا گیا کہ ہجوم سے کلاشنکوف اور دیگر اسلحہ سمیت افراد کو حراست میں لیا گیا، منصوبے کے تحت جوڈیشل کمپلیکس اور ہائی کورٹ پر حملے کی کوشش کی گئی۔
