اسلام آباد: وفاقی وزیر داخلہ راناثنااللہ نے کہا ہے کہ پولیس کا ادارہ جتنا فعال ہوگا اتنا ہی جان و مال کی حفاظت ممکن ہوگی۔
اے آر وائی نیوز کے مطابق وفاقی وزیر داخلہ راناثنااللہ نے میڈیا سے گفتگو کرتے ہوئے کہا کہ جان اور مال کی حفاظت سے ہی ریاست کے تصور نے جنم لیا، کسی بھی ریاست کی بنیادی ذمہ داری اسکے شہریوں کی مال و جان ہے۔
وفاقی وزیر داخلہ کا کہنا تھا کہ شہریوں کے جان اور مال کی حفاظت کو یقینی بنایا جائے، پولیس کا ادارہ جتنا فعال ہوگا اتنا ہی جان و مال کی حفاظت ممکن ہوگی، ریاست کا بنیادی مقصد کاروبار یا دیگر معاملات میں الجھنا نہیں ہے۔
انہوں نے کہا کہ ریاست کو بنیادی طور پر جان اور مال کی حفاظت کا فریضہ سر انجام دینا چاہئے، جان ومال کو تحفظ دیے بغیر کوئی ریاست خوشحال اور آگے نہیں بڑھ سکتی۔
راناثنااللہ نے مزید کہا کہ یہ بنیادی مقصد ریاست کی لا اینڈ فورسمنٹ ایجنسی پورا کرتی ہیں، امید کرتا ہوں آپ اسی جذبے سے اپنے فرض کو نبھائیں گے۔
