وزیر اعظم کے مشیر برائے سیاسی امور رانا ثنا اللہ نے خیبر پختونخوا حکومت کے ترجمان بیرسٹر سیف سے اہم ملاقات کی ہے۔
ذرائع نے اے آر وائی نیوز کو بتایا کہ اہم ملاقات میں رانا ثنا اللہ نے پی ٹی آئی سے مفاہمت کی بات کی جس پر بیرسٹر سیف نے کہا کہ مفاہمت پر بات ہو سکتی ہے۔
رانا ثنا اللہ نے بیرسٹر سیف سے کہا کہ آپ کو بات سیاسی حکومت سے ہی کرنا پڑے گی۔
یہ بھی پڑھیں: سابق گورنر نے عمران خان کے زوال کی بڑی وجہ بتا دی
گزشتہ روز چیئرمین پی ٹی آئی بیرسٹر گوہر نے میڈیا سے گفتگو میں کہا تھا کہ عمران خان نے کہا ہے کہ اسٹیبلشمنٹ کے ساتھ مذاکرات کے دروازے کبھی بند نہیں ہوئے ہیں، پی ٹی آئی پاکستان کی بڑی جماعت ہے بانی بڑے لیڈر ہیں یہ سختیاں اب ختم ہونی چاہیے۔
اس سے قبل بیرسٹر گوہر نے اے آر وائی نیوز سے خصوصی گفتگو میں کہا تھا کہ وزیر اعظم شہباز شریف کی مذاکرات کی پیشکش پر بانی چیئرمین عمران خان سے مشاورت جاری ہے۔
یاد رہے کہ پچھلے دنوں قومی اسمبلی کے اجلاس سے خطاب کرتے ہوئے وزیر اعظم شہباز شریف نے پی ٹی آئی کو قومی مذاکرات میں شامل ہونے کی دعوت دی تھی۔
بیرسٹر گوہر نے بتایا تھا کہ عمران خان سے جو گفتگو ہوئی اسے پبلک نہیں کروں گا، کور کمیٹی کی چیزیں بھی لیک نہیں ہونی چاہئیں، پارٹی اور کارکنوں سمیت سب سے کہتا ہوں کہ اسپوائلر کا کردار ادا نہ کریں، جن کو چیزوں کا علم نہیں وہ نہ بولیں، باقاعدہ بات چیت کا آغاز ابھی تک کہیں نہیں ہوا۔
ان کا کہنا تھا کہ اچھی خبریں آنی چاہئیں اب ملک میں بھی سیاسی سیز فائر ہونا چاہیے، عمران خان اور بشریٰ بی بی نا حق سیاسی بنیادوں پر جیل میں ہیں، میڈیا سے کچھ نہیں چھپائیں گے لیکن ڈیل بھی نہیں ہوگی۔
’ایک دو دنوں میں چیزیں کلیئر ہو جائیں گی۔ احتجاج ہمیشہ سیاسی جماعتیں کرتی ہیں اس آپشن کو آف دی ٹیبل نہیں رکھا تھا۔ پاکستان کیلیے ہر وقت سیاسی مفادات سے بالاتر ہو کر ساتھ ہوں گے۔‘
