جٹرانوالہ: مسلم لیگ (ن) پنجاب کے صدر رانا ثنا اللہ نے بانی پی ٹی آئی کو تنقید کا نشانہ بناتے ہوئے کہا ہے کہ ملک پر ایسے شخص کو مسلط کیا گیا جس کے مزاج میں جمہوریت نہیں تھی۔
پارٹی ورکرز سے خطاب کرتے ہوئے رانا ثنا اللہ نے کہا کہ بانی پی ٹی آئی نے جھوٹے مقدمے بنائے اور لوگوں کو جیلوں میں ڈالا، اس نے میرے خلاف گھٹیا مقدمہ بنایا میں 7، 6 ماہ بعد جیل سے رہا ہوا، سازش کے تحت غیر جمہوری شخص کو ملک پر مسلط کیا گیا۔
رانا ثنا اللہ نے کہا کہ بانی پی ٹی آئی امریکا میں کہتا تھا پاکستان جا کر دیکھوں گا انہیں سہولتیں تو نہیں ملیں، خود جیل میں بیٹھا فائیو اسٹار ہوٹل کی سہولتیں لے رہا ہے، سعودی عرب سے ہو کر آیا تو کہتا تھا وہاں کا قانون بہت اچھا ہے، وہ اسمبلی میں اپوزیشن کو کبھی سلام نہیں کرتا تھا اور دیکھتا بھی نہیں تھا۔
رہنما (ن) لیگ نے کہا کہ اُس شخص نے ملک کو معاشی طور پر دیوالیہ کر دیا، بجلی پر سبسڈی کیوں ختم کی تو کہتا تھا آئی ایم ایف نے کہا ہے، پیٹرول کیوں مہنگا کیا گیا تو کہتا تھا آئی ایم ایف کا معاہدہ ہے۔
انہوں نے کہا کہ امید ہے عام انتخابات میں سادہ اکثریت مل جائے گی، نواز شریف (ن) لیگ کے وزارت عظمیٰ کے امیدوار ہیں، ووٹ کو عزت دو کا مطلب ہے 5 سال میں لوڈشیڈنگ ختم کر دیں گے۔
