اسلام آباد : وفاقی وزیر داخلہ رانا ثنااللہ نے ایک بار پھر دھمکی دیتے ہوئے کہا اینٹ کاجواب پتھرسے دیا جائے گا ، جب وہ کہیں، ہم نہیں رہیں گےتو پھرہم بھی کوشش کریں گے یہ نہ رہیں۔
تفصیلات کے مطابق وفاقی وزیرداخلہ رانا ثنا اللہ نے نجی ٹی وی چینل کے پروگرام میں گفتگو کرتے ہوئے کہا کہ ہمیں کہا جاتا رہا چھوڑوں گا نہیں، چھپنے کی جگہ نہیں ملےگی، جب عمران خان کی سیاست یہی ہے تو پھر کیا ہم چھوڑ کر بھاگ جائیں۔
راناثنااللہ کا کہنا تھاکہ دھمکیاں کب تک کوئی برداشت کرے گا آخرجواب بھی دیا جائے گا اور اینٹ کا جواب پتھر سے دیا جائے گا۔
وفاقی وزیرداخلہ نے مزید کہا کہ جب وہ کہیں گے ہم نہیں رہیں گے تو پھر ہم کوشش کریں گے یہ نہ رہیں۔
ان کا مزید کہنا تھا کہ پارلیمنٹ انتظار کرتی رہی اس شخص نے کہا کیا میں چوروں سےبات کروں، ہمارامطالبہ فل کورٹ بنانے کا ہے، فل کورٹ بیٹھ کرفیصلہ کرے۔
یاد رہے وزیرداخلہ رانا ثنااللہ نے ایک انٹرویو میں کہا تھا کہ عمران خان معاملات کو جس سطح پر لے گئے ہیں۔ اب وہ سیاست سےمائنس ہوجائیں گے یا ہم۔
رانا ثنااللہ کا کہنا تھا کہ جب ہم سمجھیں گے ہمارے وجود کی نفی ہو رہی ہے تو ہرحد تک جائیں گے، پھر یہ نہیں سوچا جاتا کہ یہ جمہوری ہے یہ غیرجمہوری اور یہ اصولی یہ بے اصولی۔
انھوں نے مزید کہا تھا کہ ملک اور ملک کی سیاست کو وہاں پر لاکھڑا کردیا ہے کہ اب دونوں میں سے ایک کا وجود ہی باقی رہے گا، انارکی پھیلی ہوئی ہے، عمران خان کے ساتھ جتنے لوگ ہیں وہ ہمیں اپنا دشمن سمجھتے ہیں۔
