لاہور: پاکستان مسلم لیگ (ن) کے رہنما رانا ثناء اللہ نے صدارتی انتخابات میں پیپلز پارٹی کے کردار کو تنقید کا نشانہ بناتے ہوئے کہا ہے کہ میں اپنی اس بات پر اب بھی قائم ہوں کہ اعتزاز احسن جمہوری قوتوں کے نمائندے نہیں ہیں۔
وہ اے آر وائی نیوز کے خصوصی ٹرانسمیشن میں گفتگو کر رہے تھے، سابق وزیرِ قانون نے کہا ’پیپلز پارٹی حقیقی اپوزیشن کا کردار کبھی بھی ادا نہیں کرے گی۔‘
رانا ثناء اللہ نے اتحاد کی حقیقت کے حوالے سے بھی بات کی، کہا پیپلز پارٹی، ایم ایم اے اور ن لیگ کبھی کسی اتحاد کا حصہ نہیں تھے، ن لیگ ہی پارلیمنٹ میں حقیقی اپوزیشن کا کردار ادا کرے گی۔
ن لیگی رہنما نے عام انتخابات کو وسیع پیمانے پر دھاندلی زدہ قرار دیتے ہوئے کہا کہ الیکشن 2018 میں جعلی مینڈیٹ نے تمام جماعتوں کو دھاندلی پر متفق کیا۔
رانا ثناء اللہ نے کہا ’صدارتی انتخاب میں پارلیمنٹ سے حکومتی امیدوار کو 212 ووٹ ملے، حکومتی امیدوار کو مخالفین سے بھی اتنے ہی ووٹ ملے۔‘
مزید پڑھیں: عارف علوی کی کامیابی کا سہرا آصف زرداری کے سرجائے گا،سعد رفیق
خیال رہے کہ اس سے قبل رانا ثناء اللہ نے میڈیا سے گفتگو کرتے ہوئے کہا تھا کہ پیپلز پارٹی کا کردار حکومت کے سہولت کار کا ہے اور پیپلز پارٹی آئندہ ایسا ہی کردار ادا کرتی رہے گی۔
ان کا کہنا تھا کہ اعتزاز احسن کا نام دینا جمہوری اصولوں کی خلاف ورزی تھی، تقاضا تھا تمام جماعتیں بیٹھ کر امیداور کا فیصلہ کرتیں۔