کراچی : پاکستان رینجرز سندھ نے کراچی کے علاقے الفلاح اور شاہ فیصل کالونی کے علاقوں میں پولیس کے ساتھ مشترکہ کارروائی کرتے ہوئے مجموعی طور پر چار ملزمان کو گرفتار کرکے ان سے اسلحہ برآمد کرلیا۔
تفصیلات کے مطابق پاکستان رینجرز سندھ نے انٹیلی جنس معلومات کی بنیاد پر الفلاح اور شاہ فیصل کالونی کے علاقوں میں پولیس کے ساتھ مشترکہ کارروائی کرتے ہوئے دو ملزمان لیاقت چانڈیو اور سرفراز چھوٹو کو گرفتار کرلیا۔
ملزمان لوگوں سے لوٹ مار کرنے، غیر قانونی اسلحہ رکھنے، ڈکیتی اور اسٹریٹ کرائم کی متعدد وارداتوں میں ملوث ہیں۔
دوسری کارراوئی میں کھارادر اور چاکیواڑہ کے علاقوں میں رینجرز نے ایکشن لیتے ہوئے دو ملزمان محمد نورالزمان اور عبد الوحید عرف ڈیڈھل کو گرفتار کیا۔
اس حوالے سے ترجمان رینجرز کا کہنا ہے کہ گرفتار ملزمان اسٹریٹ کرائم کی متعدد وارداتوں میں ملوث ہیں۔ ملزمان کے قبضے سے اسلحہ، ایمونیشن اورمسروقہ ساما ن بھی برآمد کرلیا گیا ہے اور تمام ملزمان کو قانونی کارروائی کیلئے پولیس کے حوالے کر دیا گیا ہے۔
رینجرز نے اپنے اعلامیہ میں عوام سے اپیل ہے کہ ایسے شر پسند اور جرائم پپیشہ عناصر کے بارے میں اطلاع فوری طور پر قریبی چیک پوسٹ،رینجرز ہیلپ لائن 1101 یا رینجرز مددگار واٹس ایپ نمبر03162369996 پر کال یا ایس ایم ایس کے ذریعے دیں۔ آپ کا نام صیغہ راز میں رکھا جائے گا۔
