کراچی: آرمی چیف جنرل راحیل شریف نے شہرِقائد میں امن وامان کے حوالے سے اعلیٰ سطحی اجلاس میں شرکت کی۔
ڈی جی آئی ایس پی آر جنرل عاصم سلیم باجوہ نے اپنے ٹویٹر پیغام میں کہا ہے کہ آرمی چیف کی زیرصدارت ہونے والے اجلاس میں پاکستان رینجرز نے آرمی چیف کو اب تک کی صورتحال پر بریفنگ دی۔
رینجرز کی جانب سے دی جانے والی بریفنگ میں کراچی کے جن بڑے جرائم کی تفصیلات فراہم کی گئیں ان میں دہشت گردی، بھتہ خوری، گینگ وار اور ٹارگٹ کلنگ شامل ہیں۔
رینجرز کے مطابق کراچی میں دہشت گردی کے واقعات میں 69 فیصد جبکہ ٹارگٹ کلنگ کے واقعات میں 80 فیصد کمی پیش آئی ہے۔
بریفنگ میں کہا گیا کہ کراچی میں بھتہ خوری میں 85 فیصد جبکہ گینگ وار کے واقعات میں 90 فیصد کمی آئی ہے۔
آرمی چیف نے شہر قائد میں قیام امن کے لئے رینجرز کی کاوشوں کو سراہتے ہوئے شہرمیں مکمل قیام امن تک کراچی آپریشن جاری رکھنے کا عندیہ دیا۔
