The news is by your side.

Advertisement

بھارت: آسمان میں روشن ہالہ نمودار

حیدرآباد: بھارتی ریاست تلنگانہ میں آسمان میں ایک روشن ہالہ نمودار ہوا جس نے لوگوں کو ورطہ حیرت میں ڈال دیا۔

تفصیلات کے مطابق بھارتی شہر حیدرآباد سمیت تلنگانہ ریاست کے مختلف مقامات پر شہریوں نے ایک حیرت انگیز اور دل کش نظارہ دیکھا، جس سے وہ زبردست تجسس میں مبتلا ہوئے۔

دراصل بدھ 2 جون کو دوپہر کے وقت سورج کے اطراف 22 ڈگری کا ایک نایاب ہالہ بن گیا تھا، جس نے آسمان میں عجیب سا منظر بنا دیا تھا، حیدرآباد شہر جسے دیکھ کر حیرت زدہ ہو گیا، اسے بائیس ڈگری سرکلر ہالو بھی کہا جاتا ہے۔

یہ ایک غیر معمولی شمسی منظر ہوتا ہے، یہ اس وقت بنتا ہے جب سورج کی شعاعیں بل کھاتے بادل میں شش جہتی آئس کرسٹلز کے ذریعے اپنا راستہ بدلتی ہیں، اسے کالیڈواسکوپک ایفکٹ بھی کہا جاتا ہے۔

سورج کا یہ ہالہ دراصل آنکھوں کو جس طرح دکھائی دیتا ہے، ویسا ہوتا نہیں، اور یہ منظر فضا میں معلق آئس پارٹیکلز کے ساتھ روشنی کے ٹکرانے سے پیدا ہوتا ہے، اسی لیے یہ سرد علاقوں میں بنتا ہے، تاہم بھارت جیسے گرم ممالک میں یہ شاذ و نادر ہی نمودار ہوتا ہے۔

اس منظر میں ایسا لگتا ہے جیسے سورج قوس قزح کے ہالے سے گھرا ہوا ہے تاہم یہ قوس قزح (ریمبو) نہیں ہوتا، جس میں سرخ اور نیلے رنگ نمایاں ہوتے ہیں، ایسا دکھائی دیتا ہے کہ ان رنگوں نے سورج کے گرد دائرہ بنا دیا ہے۔

عام طور پر ایسا ہی سردیوں کے دوران چاند کے ساتھ بھی ہوتا ہے، سن ہالہ کی پیش گوئی نہیں کی جا سکتی۔

Comments

یہ بھی پڑھیں