خان پور: پنجاب کی تحصیل رحیم یار خان کے شہر خان پور میں ایک نایاب نسل کا الو موت سے لڑتا ہوا ایک شہری کے گھر میں آ گرا۔
تفصیلات کے مطابق ضلع بہالپور کی تحصیل رحیم یار خان کے شہر خان پور میں نایاب نسل کا ایک الو بھوک اور پیاس سے نڈھال ہو کر شہری کے گھر میں ڈھیر ہو گیا۔
مذکورہ الو کے بارے میں کہا جا رہا ہے کہ وہ بھوک اور پیاس کا شکار تھا، یہ معلوم نہیں ہو سکا کہ الو نے بھوک اور پیاس کی حالت میں کتنا فاصلہ طے کیا تھا، اپنی موت سے لڑتا ہوا آخر کار بے دم ہو کر گر پڑا۔
مشرق میں بے وقوف اور مغرب میں عقل مند سمجھے جانے والے اس شکاری پرندے کی خوش قسمتی تھی کہ وہ پاکستان چوک کے رہایشی سراج پتافی کے گھر میں گرا، سراج پتافی نے الو پکڑ کر اس کی ہر طرح سے دیکھ بھال کی۔
شہری سراج پتافی کا کہنا تھا کہ وہ نایاب نسل کے اس الو کو وائلڈ لائف محکمے کے حوالے کر دیں گے۔
خیال رہے کہ یہ واقعہ چند دن قبل رحیم یار خان میں پیش آیا تھا، محکمہ جنگلی حیات کے حکام کا کہنا ہے کہ نایاب نسل کا الو پاکستان میں نہیں پایا جاتا۔ الو کو وائلڈ لائف پارک رحیم یار خان میں رکھا جائے گا۔
