اسلام آباد: سپریم کورٹ بار ایسوسی ایشن کے سالانہ انتخابات کےغیر حتمی نتائج کے مطابق حامد خاں گروپ کے رشید اے رضوی صدر اورآفتاب باجوہ سیکرٹری منتخب ہوگئے۔
تفصیلات کےمطابق سپریم کورٹ بار ایسوسی ایشن کے انتخابات میں حامد خان گروپ کے وکیل رہنما رشید اے رضوی صدر منتخب ہوگئے ہیں۔نومنتخب صدر رشید اے رضوی نے اپنے مدمقابل فاروق نائیک کو 229 ووٹوں سے شکست دی۔
سپریم کورٹ بار ایسوسی ایشن کے سالانہ انتخابات میں روایتی حریف گروپوں میں حامد خان نے رشید اے رضوی جبکہ فاروق نائیک کو عاصمہ جہانگیر گروپ کی حمایت حاصل تھی۔
سپریم کورٹ بار کے انتخابات کےغیر حتمی نتائج کے مطابق رشید رضوی نے 1289حاصل کیے جبکہ فاروق ایچ نائیک کو 1060 ووٹ ملے۔
فاروق ایچ نائیک پیپلز پارٹی اور مسلم لیگ نون کے مشترکہ امیدوار تھے جبکہ رشید رضوی کو تحریک انصاف کی حمایت حاصل تھی۔
عاصمہ جہانگیر گروپ کے لیے سپریم کورٹ بار کے انتخابات کے نتائج ایک بڑا اپ سیٹ ہے اور6 برس کے بعد سپریم کورٹ بار میں حامد خان گروپ کو کامیابی ملی ہے۔
خیال رہے کہ سپریم کورٹ بار الیکشن میں مجموعی طورپر 2ہزار 951وکلاء نے حق رائے دہی میں حصہ لیا۔الیکشن کی نگرانی کےفرائض ریٹرنگ افسر چوہدری افراسیاب خان نے کی۔
واضح رہے کہ رشید اے رضوی پاکستان بار کونسل کے رکن ہیں اور انہوں نے جنوری 2000 میں مشرف کے دور میں پی سی او کے تحت حلف نہیں اٹھایاتھا۔
0
20
