کراچی : شہر قائد سے تعلق رکھنے والے مارشل آرٹ کے ماہر محمد راشد نسیم نے ایک بار پھر بھارتی کھلاڑی کو شکست دے کر کامیابی اپنے نام کرلی۔
بھارتی کھلاڑی کوسر کی جانب سے 239اخروٹوں کو سر سے توڑ کر بنائے جانے والے ریکارڈ کو محمد راشد نسیم نے 254 اخروٹ توڑ کر اپنے نام کرلیا اور ایک بار پھر گینز بک آف ورلڈ ریکارڈ میں اپنا نام درج کرادیا۔
راشد نسیم اب تک گینز بک آف ورلڈ ریکارڈ کی مختلف کیٹگریز میں پاکستان کیلیے 60 ورلڈ ریکارڈ بناچکے ہیں۔
گنیز بک آف ورلڈ ریکارڈ کے لیے اٹلی کے مشہور ٹی وی شو لا نوتی دای ریکارڈ میں کراچی سے تعلق رکھنے والے پاکستانی کھلاڑی محمد راشد نے شرکت کی۔
اس مقابلے میں محمد راشد نے بھارتی کھلاڑی کوسر کے ایک منٹ میں 239 کے مقابلے میں سر سے 254 اخروٹ توڑ کر نیا ریکارڈ قائم کیا۔
محمد راشد نے قبل ازیں 180 اخروٹ توڑ کر عالمی ریکارڈ قائم کیا تھا تاہم نوین کمار نے217 اخروٹ توڑ کر یہ ریکارڈ اپنے نام کر لیا تھا لیکن اب محمد راشد نے ایک مرتبہ پھر نیا ریکارڈ قائم کرکے اپنا کھویا ہوا عالمی اعزاز دوبارہ حاصل کرلیا ہے۔
کراچی سے تعلق رکھنے والے مارشل آرٹ کے کھلاڑی محمد راشد اب تک 60 ورلڈ ریکارڈ بنا چکے ہیں جبکہ ان کے اکیڈمی ریکارڈز کی تعداد 75 ہوچکی ہے۔
مزید پڑھیں : راشد نسیم نے بھارت کے مارشل آرٹ ماسٹر پبھاکر ریڈی کا ایک اور ریکارڈ توڑ دیا
واضح رہے کہ اس سے قبل محمد راشد نے بھارتی کنگفو پلئیر پبھاکر ریڈی کو کہنی سے اخروٹ توڑنے کے مقابلے میں شکست دی تھی، محمد راشد نے کہنی کے وار سے ایک منٹ میں 256 اخروٹ توڑ کر ریکارڈ اپنے نام کیا تھا۔
مزید پڑھیں : ماسٹر راشد نسیم کی 7 سالہ بیٹی نے بھی بھارت کا ریکارڈ توڑ دیا
اس کے علاوہ ماسٹر راشد نسیم کی 7 سالہ بیٹی بھی اپنے والد کے نقش قدم پر چلتے ہوئے بھارت کو گنیز بک آف ورلڈ ریکارڈ سے محروم کرچکی ہیں، سات سالہ فاطمہ نے ایک منٹ میں 211 مرتبہ کہنی مارنے کا بھارتی ریکارڈ چکنا چور کیا تھا۔
فاطمہ نسیم نے ایک منٹ میں 242 بار دونوں کہنی سے ٹارگٹ کو ہٹ کرکے ورلڈ ریکارڈ بنا کر گنیز بک آف ورلڈ ریکارڈ میں نام درج کروایا۔
