ہریانہ : بھارتی پولیس نے ہزاروں لیٹر شراب پینے کا الزام معصوم چوہوں پر ڈال دیا، ہریانہ کے 25 تھانوں میں موجود 29ہزار لیٹر شراب غائب ہونے کے واقعے نے نئی بحث چھیڑ دی۔
بھارتی ریاست ہریانہ کے شہر فرید آباد کے تھانوں سے 29 ہزار لیٹر شراب غائب ہے۔ ایک دو نہیں بکہ شہر کے کل 30 میں سے 25 تھانوں سے 29 ہزار لیٹر شراب غائب ہونے سے کھلبلی مچ گئی۔
صورتحال کے برعکس اس حوالے سے پولیس افسران نے مجرمانہ خاموشی اختیار کر رکھی ہے، جبکہ سوال یہ بھی پیدا ہو رہا ہے کہ مال خانوں میں موجود اتنی بڑی مقدار میں شراب آخر کس طرح غائب ہو گئی؟
پراسرار طور پر غائب ہونے والی ہزاروں لیٹر شراب کے کین اور بوتلیں فرید آباد کے مختلف پولیس تھانوں کے مال خانوں میں رکھی ہوئی تھی۔
خیال رہے کہ گزشتہ دنوں فرید آباد پولیس کی جانب سے ایک کارروائی میں تقریباً 50000 لیٹر دیسی اور کچی شراب، تقریباً 30000 لیٹر انگریزی شراب اور تقریباً 3000 کین بیئر ضبط کی گئی تھی۔
اس سلسلہ میں تقریباً 825 مقدمات بھی درج ہوئے تھے جبکہ یہ مقدمہ عدالت میں زیر سماعت ہے، ضبط شدہ شراب کو متعلقہ تھانوں کے مال خانہ میں رکھا گیا تھا۔
ان معلومات کا انکشاف خود پولیس کے اعداد و شمار سے ہوا ہے۔ اس حوالے سے جب متعلقہ پولیس افسران سے باز پرس کی گئی تو ان کے پاس وہی گھسا پٹا پرانا جواب تھا کہ ساری شراب چوہے پی گئے۔
یاد رہے کہ دیسی شراب کی بوتلیں زیادہ تر پلاسٹک کی ہوتی ہیں اور برآمد ہونے والی کچی شراب بھی عموماً پلاسٹک کے بڑے ڈرموں میں ہی رکھی جاتی ہے جنہیں چوہے کاٹ سکتے ہیں۔
یہ معاملہ اس وقت اور بھی دلچسپ ہوگیا کہ واقعے میں نو ہزار لیٹر انگریزی شراب بھی غائب ہے جو شیشہ کی بوتلوں میں رکھی جاتی ہے۔
