تحریک انصاف کے رہنما رؤف حسن نے دعویٰ کیا ہے کہ جے یو آئی کے ڈرافٹ میں آئینی بینچ کی تجویزہماری ہے، ہم سمجھتےہیں مولانافضل الرحمان نے پی پی کو آئینی بینچ پر منالیا ہے۔
تفصیلات کے مطابق پاکستان تحریک انصاف کے رہنما رؤف حسن نے اے آر وائی نیوز کے پروگرام الیونتھ آورز میں گفتگو کرتے ہوئے کہا کہ کل جے یو آئی ف قیادت کیساتھ ہماری ملاقات طے ہوچکی ہے، جے یو آئی ف کےڈرافٹ پراتفاق ہوتاہے تو اچھی بات ہے۔
رہنما پی ٹی آئی کا کہنا تھا کہ جے یو آئی کے ڈرافٹ میں آئینی بینچ کی تجویز ہماری جانب سےدی گئی، ہم سمجھتے ہیں کہ مولانافضل الرحمان نے پی پی کو آئینی بینچ پر منالیا ہے۔
انھوں نے بتایا کہ مولانا فضل الرحمان سے کل ملاقات میں تمام نکات پربات چیت ہوگی، جے یو آئی ف کا مسودہ ہمارے پاس موجود ہے، جس پرہمارا اتفاق ہے، یقین ہے مولانا آئین کے قتل میں شامل نہیں ہوں گے بلکہ تاریخی کردار ادا کریں گے۔
پاکستان تحریک انصاف کے رہنما نے مزید کہا کہ موجودہ پارٹیوں کیساتھ ہمارا تجربہ اچھا نہیں رہا، موجودہ پارٹیاں بعض اوقات کہتی کچھ ہیں اورکرتی کچھ اورہیں۔
انھوں نے مزید بتایا کہ کل بھی مولانا فضل الرحمان نے کہا تھا کہ ہمارامسودہ ہی آگے چلے گا اور جو مسودہ ن لیگ نے پیش کیا تھا وہ مستردکرچکے ہیں، تجویز تھی کہ نئی عدالت نہیں بنے گی سپریم کورٹ کو تابع نہیں کیا جائے گا، آئینی بینچ بنے گا اور سپریم کورٹ کےسینئرترین ججز ہوں گے۔
رہنما کا کہنا تھا کہ آئینی بینچ بنے گا تو وہ صدر یا وزیراعظم کے تابع نہیں ہوگا، آئینی بینچ بننے کے بعد سپریم کورٹ اور مضبوط ہوگی، سپریم کورٹ میں 65 ہزار کیسز التوا میں ہیں، جس میں 152 آئینی کیسز ہیں، 152 آئینی کیسز کیلئے الگ سےعدالت نہیں بنائی جاسکتی۔
