The news is by your side.

Advertisement

بالی ووڈ اداکارہ روینا ٹنڈن پاکستان کی تعریف کیے بغیر نہ رہ سکیں

ممبئی: معروف بالی ووڈ اداکارہ روینا ٹنڈن بھارت سے اومان جانے والی پرواز کو حادثے سے بچانے والے پاکستانی شخص کے اقدام کو سراہے بغیر نہ رہ سکیں۔

تفصیلات کے مطابق بھارتی اداکارہ روینا ٹنڈن نے سماجی رابطے کی ویب سائٹ ٹویٹر پر اپنے پیغام میں کہا کہ ’جب انسانیت سیاست سے جیت جائے۔‘

روینا نے اپنے ٹویٹ میں مزید کہا کہ پاکستانی ایئر ٹریفک کنٹرولر نے جے پور سے مسقط جانے والی پرواز کو تباہ ہونے سے بچالیا، اس ہیرو کے اقدام کو سراہتی ہوں۔

واضح رہے کہ چند روز قبل پاکستان سول ایوی ایشن اتھارٹی کے ایک ایئرٹریفک کنٹرولر نے بھارت سے اومان جانے والے ایک طیارے کو حادثے سے بچالیا تھا۔

بھارت کے شہر جے پور سے مسقط جانے والے مسافر طیارے میں 150 مسافر سوار تھے اور طیارہ کراچی ریجن کے اوپر سے گزرتے وقت خراب موسم میں پھنس گیا تھا۔

یاد رہے کہ آسمانی بجلی گرنے کی وجہ سے جہاز 36 ہزار فٹ کی بلندی سے یکدم 2 ہزار فٹ کی بلندی کم کرکے 34 ہزار کی بلندی پر آگیا اور اس دوران پائلٹ نے ایمرجنسی پروٹوکول کے تحت قریبی اسٹیشنز سے رابطہ کیا تھا۔

اس موقع پر پاکستان میں سی اے اے کے ایئرٹریفک کنٹرولر نے فوری طور پر مذکورہ پائلٹ کو پیغام کا جواب دیا اور جہاز کے کپتان کو پاکستانی فضا میں موجود شدید فضائی ٹریفک سے نکلنے میں مدد فراہم کی۔

Comments

comments

یہ بھی پڑھیں