کراچی: خام اسٹیل مارکیٹ میں 2 بڑی اسٹیل کمپنیوں کا صارفین کے خلاف گٹھ جوڑ بے نقاب ہو گیا ہے۔
تفصیلات کے مطابق کمپٹیشن کمیشن آف پاکستان (سی سی پی) نے خام اسٹیل مارکیٹ میں ایک مبینہ کارٹل سے متعلق اپنی انکوائری مکمل کر لی ہے، کارٹل کو بے نقاب کر دیا ہے۔
کمپٹیشن کمیشن نے کارٹل بنانے والے سپلائرز کو شوکاز نوٹس بھی جاری کر دیے ہیں، انکوائری رپورٹ کے مطابق انٹرنیشنل اسٹیل اور عائشہ اسٹیل ملز نے مبینہ طور پر گٹھ جوڑ سے قیمتوں میں اضافہ کیا، اور خام اسٹیل کی قیمتوں میں اس کارٹل نے 111 گنا اضافہ کیا۔
انکوائری رپورٹ میں کہا گیا ہے کہ خام اسٹیل کے مذکورہ دونوں بڑے سپلائرز مل کر قیمتیں طے کرتے تھے، 3 سال کے دوران خام اسٹیل کی قیمت میں 1 لاکھ 46 ہزار روپے فی ٹن کا اضافہ کیا گیا۔
کمپٹیشن کمیشن کا کہنا ہے کہ دونوں اسٹیل سپلائرز کے درمیان سیکنڈری میٹریل کی فروخت پر بھی گٹھ جوڑ تھا، اسٹیل ملز پر چھاپے کے دوران کارٹل بنانے کے واضح ثبوت حاصل ہوئے۔
سی سی پی کے مطابق قیمتوں کو گٹھ جوڑ کر کے فکس کرنا صارفین کے حقوق کی خلاف ورزی ہے، اور مارکیٹ میں ہر گٹھ جوڑ کو ناکام بنانے اور آزادانہ مقابلے کو یقینی بنایا جائے گا۔
