راولپنڈی میں نان کسٹم سگریٹ قبضے میں لینے والی ایف بی آر ٹیم پر ملزمان نے حملہ کردیا جس کے نتیجے میں ایک کسٹم اہلکار زخمی ہوگیا۔
تفصیلات کے مطابق راولپنڈی میں نان کسٹم سگریٹ قبضے میں لینے والی ایف بی آر ٹیم پر ملزنام نے حملہ کردیا، حملے کے دوران راڈ لگنے سے ایل ڈی سی عمران زخمی ہوگئے۔
ذرائع کا کہنا ہے کہ اسسٹنٹ ڈائریکٹر کی مدعیت میں ملزمان کیخلاف تھانہ گنج منڈی میں مقدمہ درج کرلیا گیا ہے، مقدمہ اقدام قتل،کار سرکار میں مداخلت سمیت دیگر دفعات کے تحت درج کیا گیا۔
مقدمے کے متن کے مطابق گاڑی سے 20کارٹن نان کسٹم سگریٹ قبضہ میں لی گئی، نان کسٹم سگریٹ سرکاری گاڑی میں لوڈ کرتے وقت ملزمان نے حملہ کیا، ملزمان نے گاڑی سے زبردستی سگریٹ نکالی اور گاڑی کے شیشے بھی توڑ دیئے۔
سیلز ٹیکس چوری کیخلاف ایف بی آر کی بڑی کارروائی، کروڑوں کا مال برآمد
واضح رہے کہ 23 مئی کو فیڈرل بورڈ آف ریونیو (ایف بی آر) ان لینڈ ریونیو نے سکھر اور ملتان میں بڑی کارروائیاں کرتے ہوئے کروڑوں روپے مالیت کی نان کسٹم اور نان ٹیکس پیڈ غیر قانونی سگریٹس کو نذر آتش کردیا تھا۔
ایف بی آر نے جنوبی پنجاب کے مختلف علاقوں میں چھاپے مار کر تین ہزار سے زائد کارٹنز پر مشتمل نان ٹیکس پیڈ سگریٹس کو تحویل میں لیا، جنہیں بعد ازاں نذر آتش کر دیا گیا۔ چیف کمشنر ان لینڈ ریونیو ڈاکٹر سرمد قریشی نے بتایا کہ تلف کی گئی سگریٹس کی مالیت 15 کروڑ روپے سے زائد ہے۔
انہوں نے کہا کہ غیر قانونی سگریٹ کی خرید و فروخت میں ملوث افراد کو تین سال قید اور 25 ہزار روپے تک جرمانے کی سزا ہو سکتی ہے۔ ان کا مزید کہنا تھا کہ ایف بی آر ایسی کارروائیوں کے ذریعے ملکی معیشت کو نقصان پہنچانے والے عناصر کے خلاف سخت اقدامات جاری رکھے گا۔
