راولپنڈی: گاڑیاں چوری کرنے والے گروہ نے پولیس پر فائرنگ کردی جس کے نتیجے میں خاتون سمیت دو افراد زخمی ہوگئے۔
نمائندہ اے آر وائی نیوز کے مطابق روالپنڈی میں واقع سکستھ روڈ پر گروہ نے ایک گاڑی چوری کرنے کی کوشش کی جس پر پولیس اہلکار وہاں پہنچے۔
پولیس کو دیکھتے ہی گروہ میں شامل مسلح افراد نے فائرنگ کردی، جس کی زد میں راہگیر خاتون اور ایک مرد آیا۔
پولیس ترجمان کے مطابق فائرنگ سے خاتون سمیت 2افراد زخمی ہوئے جنہیں طبی امداد کے لیے اسپتال منتقل کردیا گیا ہے۔ پولیس کے مطابق ملزمان اپنی گاڑی چھوڑ کر فرار ہوئے، جس کو قبضے میں لے کر تحقیقات کی جارہی ہیں۔
مزید پڑھیں: راولپنڈی میں فائرنگ سے دو پولیس اہلکار شہید، حملہ آور ہلاک
ترجمان پولیس کے مطابق ملزمان نے اسلام آباد کے علاقے سے ایک اور گاڑی بھی چھینی تھی ، جسے وہ جنگل میں چھوڑ کر فرار ہوئے ہیں۔
پولیس ترجمان کے مطابق اے ایس پی نیوٹاؤن کی سربراہی میں پولیس ملزمان کا تعاقب کر رہی ہے اور جنگل میں سرچ آپریشن شروع کردیا گیا ہے۔
