راولپنڈی: جی ٹی روڈ کے قریب افسوسناک حادثہ پیش آیا جہاں ڈمپر نے موٹرسائیکل کو ٹکر مار کے ماں اور بچے کی جان لے لی۔
پولیس حکام کے مطابق ڈمپر نے موٹرسائیکل کو ٹکر ماری جس میں ماں اور بچہ جاں بحق ہوئے جبکہ باپ کو شدید زخمی میں اسپتال منتقل کر دیا گیا۔
حادثے کے بعد ڈمپر کا ڈرائیور فرار ہوگیا۔
یہ بھی پڑھیں: ڈمپر کی رکشا اور موٹرسائیکل کو ٹکر، لڑکا اور لڑکی جاں بحق، 2 زخمی
گزشتہ روز لاہور کے جی ٹی روڈ آخری اسٹاپ کے قریب ڈمپر نے رکشوں اور موٹرسائیکلوں کو ٹکر ماری تھی جس کے نتیجے میں 5 افراد جاں بحق ہوگئے تھے۔
ریسکیو 1122 حکام کے مطابق ڈمپر نے 3 رکشوں اور 2 موٹرسائیکلوں کو ٹکر ماری، حادثے میں 3 افراد زخمی بھی ہوئے، حادثہ ڈمپر کی بریک فیل کے باعث پیش آیا جبکہ ڈرائیور موقع پر ہی فرار ہوگیا ۔
ریسکیو 1122 کی ٹیموں نے جاں بحق اور زخمی ہونے والوں کو ڈمپر کے نیچے سے نکالا اور انہیں اسپتالوں میں منتقل کیا۔
دوسری جانب وزیر اعلیٰ پنجاب مریم نواز نے اس حادثے پر افسوس کا اظہار کیا اور ساتھ ہی انہوں نے زخمیوں کو بہترین طبی سہولتیں فراہم کرنے کی ہدایت بھی کی۔
آئی جی پنجاب نے واقعے کا نوٹس لیتے ہوئے سی سی پی او لاہور سے رپورٹ طلب کی۔ ڈاکٹر عثمان انور نے کہا کہ سی ٹی او لاہور میں تیز رفتار سے گاڑی چلانے والوں کے خلاف کارروائی کریں۔
